ՀՀ կրթության և գիտության նախարար Արմեն Աշոտյանն այսօր ընդունել է ՀՀ-ում Լեհաստանի արտակարգ և լիազոր դեսպան Զդիսլավ Ռաչինսկուն: Հանդիպման ընթացքում քննարկվել են Լեհաստանի և Հայաստանի Բոլոնիայի գործընթացի համանախագահության ստանձնման շրջանակում նախատեսված միջոցառումների հետ կապված հարցեր: Նախարարը նշել է, որ համանախագահության ստանձնումը երկու երկրների համար հրաշալի հնարավորություն է եվրոպական բարձրագույն կրթական տարածքում Հայաստանի մասնակցությունն ընդգծելու համար:
«Բոլոնիայի գործընթացում համանախագահությունը նոր ինստիտուտ է, և Հայաստան-Լեհաստան համագործակցությունը կլինի օրինակելի: Բոլոնիայի քարտուղարությանը ներկայացրել ենք նախատեսվող 4 միջոցառումների մասին տեղեկատվություն, որոնք Եվրամիության գործընկերության շրջանակում հետաքրքրություն են առաջացրել: Հրավիրվել են Բոլոնիայի գործընթացին համագործակցող բոլոր երկրների կրթության նախարարները, այդ թվում՝ Ադրբեջանի և Թուրքիայի: Հրավիրվել է նաև Լեհաստանի կրթության նախարարը մասնակցելու Բոլոնիայի գործընթացի շրջանակում կազմակերպվող միջոցառումներից մեկին, հատկապես սեպտեմբերի 7-8-ը բարձրագույն կրթության ֆինանսավորմանը նվիրված միջազգային կոնֆերանսին: Կոնֆերանսին արձագանքել են նաև ՀԲ Վաշինգտոնի գրասենյակից, և 7-8 նախարարներ հաստատել են իրենց մասնակցությունը: Ցանկալի է զարգացնել շփումները նաև ուսանողների մակարդակով, մասնավորապես հրավիրում ենք մասնակցել հուլիսի 3-10-ը Ծաղկաձորում կազմակերպվելիք եվրոպական ուսանողության ամառային դպրոցին, որը «Արևելյան գործընկերության» կարևորագույն ծրագրերից է»,- նշել է նախարարը և ներկայացրել կրթության ոլորտում 2011-2015թթ. Հայաստան-Լեհաստան համագործակցության ծրագրի նախագիծը:
Անդրադառնալով հայկական գաղթօջախների հետ տարվող աշխատանքներին՝ նախարարը նշել է, որ ակնկալում է լեհական կողմի ակտիվ մասնակցությունը Լեհաստանում մեր հայրենակիցների կրթության իրավունքի կայացման և ինքնության պահպանման հարցում, ինչպես նաև հայկական կիրակնօրյա դպրոցներին ուսումնական գրականության տրամադրման, ուսուցիչների վերապատրաստման կազմակերպման հարցերում:
ՀՀ-ում Լեհաստանի արտակարգ և լիազոր դեսպան Զդիսլավ Ռաչինսկին ներկայացրել է Բոլոնիայի գործընթացի համանախագահության ստանձնման շրջանակում Լեհաստանի կողմից նախատեսված միջոցառումները և Աշոտյանին հրավիրել է մասնակցելու Վարշավայում կայանալիք խորհրդակցությանը: