Հյուսիսային Կորեան հրթիռային բազա է կառուցել Պեկտուսան լեռան շրջանում, որը մոտ է Չինաստանի հետ սահմանին: Այս մասին հայտնում է հարավկորեական «Չունան իլբո» թերթը՝ հղում անելով կառավարական աղբյուրին:
Աղբյուրի փոխանցմամբ՝ այդ բազան ունի հրթիռների արձակման մեծ թվով ստորգետնյա կայաններ: Դրանց կառուցումը սկսվել էր 2000-ականներին և ավարտվում է հիմա: Աղբյուրը նշում է, որ դատելով արձակման կայանների չափերից ու դիրքից՝ կարելի է ենթադրել, որ դրանք նախատեսված են միջին և մեծ հեռահարության հրթիռների համար:
Եթե Հյուսիսային Կորեան միջին հեռահարության բալիստիկ հրթիռներ արձակի, ապա դրանք կարող են հարվածել Օկինավան և Գուամը, որտեղ տեղակայված են ամերիկյան ռազմաբազաները՝ ասել է աղբյուրը:
Բազայի վայրը ընտրվել է՝ կապված Չինաստանի սահմանին մոտ լինելու հանգամանքի հետ, քանի որ ԱՄՆ-ի և Հարավային Կորեայի համար դա կդժվարացնի այդ շրջանին հարվածներ հասցնելու հնարավորությունը:
