Վրաստանը կդառնա ՆԱՏՕ-ի առաջին գործընկեր-երկիրը, որը 2015-ից կարող է միանալ դաշինքի արձագանքման ուժերին: Այս մասին հայտարարել է Հյուսիսատլանտյան դաշինքի գլխավոր քարուղար Անդերս Ֆոգ Ռասմուսենը՝ փոխանցում է RIA Novosti-ն:
«Վրաստանն առաջարկել է ապագայում միանալ արձագանքման ուժերին, և այդ առաջարկն ընդունված է»,- ասել է նա Բրյուսելում լրագրողների հետ զրույցի ժամանակ:
Ռասմուսենը հայտնել է, որ ՆԱՏՕ-ի արձագանքման ուժերի Steadfast Jazz առաջիկա զորավարժություններին կմասնակցեն Ուկրաինան և Ֆինլանդիան:
Այս տարի զորավարժությունների սցենարը նախատեսում է հակառակորդի կողմից զորքերի կառավարման ցանցային ենթակառուցվածքին կիբեռտարածությունից մասշտաբային հարվածի ուղղում՝ սեպտեմբերին տեղեկացրել էր դաշինքի զինվորական հրամանատարությունը:
Զորավարժությունների անցկացումը ծրագրված է նոյեմբերի 2-9-ը Լեհաստանի և Մերձբալթյան երկրների տարածքում: Զորավարժություններին կմասնակցեն 28 երկրի շուրջ 6000 զինծառայողներ:
