ԱՄՆ-ը որոշել է դադարեցնել ծանր սպառազինության մատակարարումները Եգիպտոս և սահմանափակել ֆինանսական օգնությունը: Այս մասին մամլո ասուլիսի ժամանակ հայտարարել է Պետդեպի մամլո քարտուղարի տեղակալ Մարի Հարֆը՝ փոխանցում է RBK-ն:
«Վերջին մի քանի տարիներին մեր գլխավոր խնդիրը եղել է եգիտացիներին օգնելը՝ ստեղծելու իրական ժողովրդավարությանը բնորոշ հատկանիշներով զարգացած քաղաքացիական հասարակություն և կառավարություն, որը կարտահայտեր ողջ եգիպտացի ժողովրդի կամքը, կճանաչեր փոքրամասնությունների իրավունքները, օրենքի գերակայությունը, խոսքի և հավաքների ազատությունը: Դա, ինչպես նախկինում, մեր հիմնական հանձնարարությունն է: Մենք ժամանակավոր կառավարության հետ կշարունակենք աշխատել այդ ուղղությամբ»,- նշել է նա:
Խոսելով մոտ հեռանկարում Եգիպտոսի հետ հարաբերությունների զարգացման մասին՝ Հարֆը զերծ է մնացել մանրամասներից՝ հայտարարելով միայն, որ գործընկերային հարաբերությունները Եգիպտոսի հետ կշարունակվեն:
Հարֆը նաև նշել է, որ Եգիպտոսը ԱՄՆ-ի համար մնում է տարածաշրջանում առանցքային գործընկեր: ԱՄՆ-ը կշարունակի եգիպտական բանակին պահեստամասեր մատակարարել ու անձնակազմին ապահովել ուսուցմամբ:
