«Ես ակնկալիք չունեմ, ցավոք սրտի, բայց ես ունեմ հույս, որ այդ ճնշումը կստիպի շուտափույթ կերպով մի լուծում գտնել»,- անդրադառնալով հունիսին Կազանում կայանալիք Սարգսյան-Ալիև-Մեդվեդև հանդիպմանն ու ԵԱՀԿ Մինսկի խմբի համանախագահող երկրների նախագահների ԼՂ հարցի շուրջ շտապողականության դրսևորմանը՝ լրագրողների հետ հանդիպման ժամանակ կարծիք հայտնեց Ազգային ինքնորոշում կուսակցության նախագահ Պարույր Հայրիկյանը:
Նրա գնահատմամբ՝ այսօր, նույնիսկ ամենաանբարենպաստ լուծումը Արցախի հարցում Հայաստանի համար շատ օգտակար է. «Մենք արցախակենտրոն մտածելակերպով կործանեցինք մեզ: Մենք ազդարարեցինք հայոց հիմնախնդիրը Արցախը, մոռանալով Սևրի պայմանագիրը՝ Թուրքիայի հետ գնացինք երկխոսության: Նախկինում Արցախն էր պատանդ, հիմա Հայաստանն է պատանդ ռուսական շովինիստական ուժերի ձեռքին, և որքան շուտ մենք դրանից ձերբազատվենք, այնքան շուտ հաջողությունների կհասնենք»:
Հայրիկյանը հույս հայտնեց, որ Ֆրանսիայի, Միացյալ Նահանգների, Ռուսաստանի այս ճնշումը կարող է ստիպել ինչ-որ հարցերում գնալ համաձայնության:
Հայրիկյանի համար ընդունելի է ԼՂ հարցի որևէ լուծում, որը չի ենթադրում Արցախի ոչնչացում. «Այդ հարցի վերջնական փակումը մեզ համար կլինի փրկարար: Մենք այսօր դանդաղ ընթացքով պարտվում ենք և որքան շուտ ավարտին հասցվի այս հարցը, այնքան ավելի շահեկան կլինի մեզ համար»: