ՀՀԿ-ն դեռևս չի քննարկել ՀԱԿ-ի հետ բանակցություններ վարող պատվիրակության կազմը և, ըստ երևույթին, չի էլ քննարկելու:
ՀՀԿ-ական պատգամավոր Հովհաննես Սահակյանը «Առաջին լրատվականի» հետ զրույցում նշեց, որ իրենք ճիշտ չեն համարում, որ մեկ պետության, մեկ ժողովրդի մեջ բանագնացներով և դեսպաններով պետք է ինչ-որ հարցերի շուրջ քննարկումներ կազմակերպել. «Չեմ կարծում, որ պատվիրակություններ կազմելը ճիշտ տարբերակ է: Եթե կան քննարկելու խնդիրներ, ապա պետական կառույցի բարձրաստիճան պաշտոնյաները պատրաստ են ցանկացած հարց քննարկեն: Սա նույնպես քննարկումների տարբերակ է, և սա նույնպես կարող է լինել որպես երկխոսություն»:
Սահակյանը նկատեց, որ ՀԱԿ-ն է որոշել, որ քննարկումները և երկխոսությունը պետք է պատվիրակությունների միջոցով իրականացվեն. «Խնդրեմ, և՛ ՀՀԿ-ն՝ որպես իշխանության մաս կազմող ուժ, և՛ մեր կոալիցիոն մյուս քաղաքական ուժերը, նաև կառավարությունը պատրաստ են բաց բանավեճի կամ աշխատանքային պայմաններում ՀԱԿ-ի հինգ հոգանոց պատվիրակության հետ քննարկել ցանկացած հարց»:
ՀՀԿ-ական պատգամավորն ընդգծեց, որ պատվիրակություն ձևավորելու որոշում այսօր ՀՀԿ-ն չի կայացրել, ավելին՝ այդ հարցը «Հանրապետական» կուսակցության օրակարգում դրված չէ: