«Հրապարակ»-ը փորձել է ճշտել հասարակության կարծիքը ՀԱԿ-ի պատվիրակության կազմի, իշխանություն–ընդդիմություն երկխոսության, դրանից ունեցած ակնկալիքների մասին: Գրականագետ Դավիթ Գասպարյանը թերթի հետ զրույցում ասել է.
«Այդ երկխոսությանը միանգամայն դրական եմ վերաբերվում: Այսպիսի հարաբերություն հնարավոր է միայն կիրթ հասարակության մեջ. ոչ թե իրար ուտեն, իրար ոտքերի տակ սղոցեն, այլ իրար հետ խոսեն, իրար ուժ տան՝ երկիրը ծանր կացությունից փրկելու համար: Դժվարանում եմ սպասելիքների մասին խոսել այն առումով, որ պահանջները պետք է հստակ լինեն: Մենք տնտեսական, բարոյական, հոգեբանական խայտառակ անկման մեջ ենք, այս մահացու արտագաղթը, աղանդների ծաղկումը, ազգային արժեքների ոչնչացումը մարդ է սպանում: Կուզենայի, որ այդ երկխոսությունն ընթանար Հայաստանի անվտանգության շուրջ, Հայաստանում բարոյական միջավայրը կարգավորելու, տնտեսություն ստեղծելու շուրջ:
Չկա ոչինչ, տնտեսությունը կատարյալ զրոյի վրա է, ո՞վ է մտածում կամաց-կամաց գործարկելու մասին: Երկիրը ծանր կացության մեջ է, պետք է փրկել: Այն, ինչ երկու տասնամյակների ընթացքում կատարվեց և կատարվում է Հայաստանում, մեր վերջն է: Մինչև երկրի տնտեսությունը ոտքի չկանգնի, մինչև ճշմարիտ արժեքները չգնահատվեն, մինչև մենք չկարողանանք հպարտ և ուղիղ իրար աչքերի մեջ նայել, կշարունակենք այդպես թալանվել, քանդվել, ավերվել և կորցնել ամենակարևորը՝ մարդը»:
Նույն խնդրով անհանգստացած ԵՊՀ դասախոսներից մեկը, ով չի ցանկացել ներկայանալ, թերթին հայտնել է. «Բանակցությունների գործընթացը պետք է տանի Հայաստանի աղբազերծմանը, մաքրմանը: Թե որքանով դա կստացվի, չեմ կարող ասել, բայց հանգուցալուծումը պետք է լինի ներկայիս իշխանության հեռանալը»:
