Լատվիայի առողջապահության նախարարությունը խնայում է հեպատիտ C-ի բուժման վրա: Այդ հիվանդությամբ տառապող մի քանի տասնյակ լատվիացիներ ստիպված են կասեցնել բուժումը կամ բուժման նպատակով այլ երկրներ գնալ:
ԵՄ երկրների մեծ մասում հիվանդության թանկարժեք բուժումը վճարվում է պետության կողմից, մինչդեռ Լատվիայում հիվանդները պետք է իրենց գրպանից վճարեն դեղորայքի արժեքի 25 տոկոսը: Ինչպես հայտնում է Delfi.lv-ն, միայն 2011-ին համաֆինանսավորմամբ բուժում է նշանակվել 600 հիվանդի, որոնցից 120-ը հրաժարվել են բուժումից միջոցների սղության պատճառով:
Հիվանդության բուժումը 1 տարի է տևում: Շատ քչերը կարող են իրենց ամսական 135-400 դոլարի վճարում թույլ տալ: Շատերը ստիպված են լինում տեղափոխվել այլ երկրներ:
Լատվիայում հեպատիտ C վիրուսով վարակված է մոտ 40 հազար մարդ կամ հանրապետության ընդհանուր բնակչության 2 տոկոսը: 2013-ի սկզբին Սեյմում ստացվել է ավելի քան 13 հազար ստորագրություն՝ հիվանդության բուժման լիարժեք փոխհատուցում ներմուծելու խնդրանքով, սակայն առաջիկա երկու տարվա համար նման ծրագրեր չկան:
