Եվրահանձնաժողովի ղեկավար Ժոզե Մանուել Բառոզուն որոշել է այցելել իտալական միջերկրածովյան Լամպեդուզա կղզի: Ինչպես այսօր հայտնել է Եվրահանձնաժողովի պաշտոնական ներկայացուցիչ Պիա Արենկիլդե Հանսենը, Բառոզուն «հարգանքի տուրք կմատուցի այն մարդկանց, ովքեր փորձել են հասնել եվրոպական քաղաքներ»: Նա կհանդիպի տեղի իշխանությունների հետ և կքննարկի ողբերգության պատճառներն ու ապագայում նման իրավիճակի կրկնությունից խուսափելու հնարավորությունները: Այս մասին հայտնում է ITAR-TASS-ը:
Աֆրիկայից 500 ներգաղթյալներով նավը հոկտեմբերի 3-ի գիշերը խորտակվել էր Լամպեդուզայից մոտ 1 կմ հեռավորության վրա: Փրկվել է 155 մարդ, հաստատվել է 194-ի մահը: Դեռ 150 մարդու ճակատագիր անհայտ է մնում:
Այդ ողբերգությունը սուր հակասություններ է առաջացրել եվրոպական քաղաքական և մեդիա դաշտում: ԶԼՄ-ները, իրավապաշտպան կազմակերպություններն ու ձախ քաղաքական գործիչները կոչ են անում օրինականացնել դեպի Եվրոպա աֆրիկացիների զանգվածային արտագաղթը և ստեղծել ներգաղթի միասնական եվրոպական քաղաքականություն: Այդուհանդերձ, շարքային քաղաքացիները սոցցանցերում կոչ են անում խստացնել վերահսկողությունը ԵՄ սահմաններում: