Օրեր առաջ Ֆեյսբուքում հայկական ամենամեծ էջերից մեկի` «Yerevan»-ի կողմից այդ սոցիալական ցանցում սկսվել է հարցում` «Ո՞րն է ֆեյսբուքի ամենաակտիվ ու ամենահայտնի հայկական էջը»։ Դրան մինչ այժմ մասնակցել է մոտ երկու հազար հոգի: Ընդ որում, յուրաքանչյուրը հնարավորություն ունի քվեարկել մեկից ավելի էջի օգտին, ինչպես նաև ավելացնել իր նախըտրած էջերը, որոնք դեռ առկա չեն ցանկում:
Քվեարկությանը մասնակցող մոտ հարյուր հայկական էջերից ամենամեծ թվով ձայները հավաքել է «1in.am Armenian News & Analyses» էջը` մոտ 500 ձայն: Երկրորդ տեղում է «News.am»-ը (մոտ 400 ձայն) և «ես նեռվային եմ»-ը (մոտ 230 ձայն):
Նշենք, որ մեր էջը իսկապես ամենաշատ անդամներ ունեցող էջերից է Ֆեյսբուքում. այս պահի դրությամբ 13,300-ից ավելի: Համեմատության համար նշենք, որ այսպես կոչված Like-երի թվաքանակով երկրորդ տեղում գտնվող լրատվական կայքի էջը հունիսի երեքի դրությամբ ունի մոտ 7700 անդամ, երրորդ տեղում գտնվողը` մոտ 6400:
Բացի դրանից, մենք իսկապես ամենաակտիվներից մեկն ենք: Ողջ օրվա ընթացքում 5-6 րոպե միջակայքով մեր ամենահետաքրքիր ու ուշագրավ լուրերն ու հոդվածները տեղադրվում են Ֆեյսբուքյան էջում, ինչի շնորհիվ հազարավոր մարդիկ հնարավորություն են ստանում իրենց հիմնական ֆեյսբուքյան լրահոսից տեղեկանալ այն ամենին, ինչ տեղի է ունենում Հայաստանում և դրանից դուրս, թողնել մեկնաբանություններ, մասնակցել ամենատարբեր թեմաներով քննարկումներին, ինչպես նաև «կիսվել» ընկերների հետ:
Հենց այս հանգամանքով է պայմանավորված մեր կայքի այցելությունների այդչափ արագ աճը, ինչը շատերի համար զարմանալի և արտասովոր կարող է դիտվել: Այսպես, եթե մեր գործունեության առաջին իսկ ամսում` 2010 թ. նոյեմբերին, հնարավոր եղավ ապահովել շուրջ 60,000 այցելություն, ապա դեկտեմբերին այդ ցուցանիշը կրկնապատկվեց` 120,000: Արդեն գարնանը` մարտ ամսին, 1in.am-ը ուներ 423,000 ամսական այցելություններ, իսկ մայիս ամսին` 465,000: Հիշյալ ցուցանիշով մենք 5-րդն էինք ամբողջ ԱրմՆեթ-ում և 4-րդը` միայն հայաստանյան այցելությունների հաշվարկով (բոլոր տվյալները` ըստ circle.am-ի): Վստահաբար, առաջիկայում այս ցուցանիշը միտում ունի է՛լ ավելի բարելավվելու:
Ավելացնենք նաև, որ բացի հիմնական էջից, գործում է նաև ռուսերեն բաժնի էջը` 1in.am Первый Армянский Информационный: Դրան ներկայումս միացել են ավելի քան 1100 օգտատեր:
Օգտագործելով այս առիթը, ցանկանում ենք շնորհակալություն հայտնել մեր 13,300-ից ավելի հետևորդներին Ֆեյսբուքում, ինչպես նաև բոլոր մյուս ընթերցողներին:
