Կովկաս ինստիտուտի ղեկավար Ալեքսանդր Իսկանդարյանը և գիտական աշխատակից Հրանտ Միքայելյանը այսօր ինստիտուտի կազմակերպած կլոր սեղանի քննարկմանը ներկայացրին հայաստանյան ԶԼՄ-ներում դեկտեբեր-փետրվար ամիսների ընթացքում հետազոտության արդյունքները: Հետազոտության թեման է ազգայնական դիսկուրսը Հայաստանում: Այն իրականացվել է հայաստանյան 10 ԶԼՄ-ներում` «Ա1+», PanArmenian net, Armenia Today, Tert.am, newz.am, panorama, «Առավոտ», lragir.am, Armtims, Regnum:
Միքայելյանը նշեց, որ դիսկուրսի ուսումնասիրությունը հիմնականում կատարվել է Ադրբեջան-Թուրքիա, Իրան-Վրաստան, Արևմուտք-Ռուսաստան և սեփական ազգային ինքնագիտակցության ուղղություններով: Թուրքիա-Ադրբեջան ստերեոտիպի ազգայնական ընկալումն, ըստ Միքայելյանի, գրեթե հավասար է, երկուսն էլ ներկայացվում են որպես թշնամիներ, սակայն եթե Ադրբեջանի հիմնական լրատվամիջոցները անդրադառնում են այն ժամանակ, երբ կա որևէ հայտարարություն` ուղղված հայկական կողմին, ապա Թուրքիային անդրադառնում են անընդհատ, քանի որ Թուրքիայի հետ ունեցած ստատուս քվոն ազգայնական առումով ընդունելի չէ:
Իրան-Վրաստան ստերոտիպը ևս հակադիր է ընկալվում, չնայած որ երկուսն էլ համարվում են բարեկամական երկրներ: Հետազոտությունները ցույց են տվել, որ Իրանն ընկալվում է որպես պաշտպան, որը թույլ չի տալիս թուրքական էքսպանսիան, իսկ Վրաստանն՝ ընդհակառակը: Միքայելյանը նշեց, որ այդ երկրների ընկալման չափանիշներից է նաև այն հանգամանքը, թե ինչքանո՞վ են հայերը բարեկեցիկ ապրում այդ երկրներում և արդյո՞ք տվյալ երկրի կողմից ճանաչվել է Հայոց ցեղասպանությունը: «Այս չափանիշներից ելնելով՝ Իրանը ավելի շահեկան դիրքերում է»,- մանրամասնեց Միքայելյանը:
