Ինչպես հաղորդում է EFE գործակալությունը, այսօր հոսպիտալացվել է Իսպանիայի թագավոր Խուան Կառլոս 1-ին դե Բուրբոնը: Նրա ոտքի վրա վիրահատական միջամտություն է կատարվելու:
Գործակալության տվյալներով, վիրահատությունն ուղղված է լինելու հոդի վերականգնմանը, որպեսզի ազատեն միապետին ծնկի խրոնիկ ցավերից: Վիրահատությունը այսօր կատարվելու է հայտնի վիրաբույժի կողմից, որը մասնագիտացված է մարզական վնասվածքների գծով:
Խուան Կառլոսի նկատմամբ ուշադրությունը վերջին մեկ տարվա ընթացքում զգալիորեն աճել է, քանի որ անցած տարի նրա մոտ հայտնաբերել էին թոքի բարորակ ուռուցք, որը հեռացվել էր:
Հիշեցնենք, որ Եվրոպայի մեկ այլ միապետի՝ Շվեդիայի թագավոր Գուստավ 16-րդի գործերն էլ լավ չեն, սակայն դրանք առողջական բնույթի չեն. նրան մեղադրում են հարավսլավական մաֆիայի հետ կապեր ունենալու մեջ: Շվեդների 63%-ը պահանջում է գահընկեց անել նրան, ինչ մասին մենք այսօր արդեն տեղեկացրել ենք:
