Մի քանի տասնյակ պաղեստինցի գյուղացիներ վերադարձրել են հողերը, որոնք երեք տասնամյակ առաջ առգրավվել էին հրեական Հոմեշ բնակավայրի կառուցման համար և վերջերս վերադարձվել Իսրայելի դատական իշխանությունների աննախադեպ որոշմամբ: Այս մասին հայտնում է RIA Novosti-ն՝ հղում անելով տեղի հեռուստաալիքներին:
«Տարածքը վերադարձնելը, որը զբաղեցվել էր հրեա նորաբնակների կողմից 1978 թվականին, մեծ հաղթանակ է: Մենք կշարունակենք պայքարել ցանկացած միջոցով մեր բոլոր հողերի վերադարձման համար, որը գտնվում է օկուպանտների ձեռքին»,- հայտարարել է պաղեստինյան իշխանությունների ներկայացուցիչ Հասան Դուգլուսը:
Իրավապաշտպանների աջակցությամբ, ովքեր հայցեր էին ներկայացրել Իսրայելի արդարադատության Գերագույն դատարան և շահել գործը, Արևմտյան ափի հյուսիսային մասի Բուրկա գյուղի բնակիչները վերադարձրել են 180 հեկտար տարածք մշակելու իրավունքը, որտեղ մինչև 2005 թվականը գտնվել է հրեական Հոմեշ բնակավայրը: «Սահմանազատման ծրագրի» շրջանակում դրա ապամոնտաժումից հետո այդ հողերը պահպանել են ռազմական գոտու կարգավիճակը, որը պաղեստինցիներին հասանելի չէր:
Պաղեստինցիները տրակտորներով, գյուղատնտեսական գործիքներով ու դրոշներով վերադարձել են քարքարոտ բլուրները և սկսել դաշտային աշխատանքները: Նրանք դրանում տեսնում են Արևմտյան ափի բոլոր օկուպացված հողերի վերադարձման սկզբունքային հնարավորության ապացույց: Արևմտյան ափի օկուպացված հողերի 120 բնակավայրերում ավելի քան 300 հազար իսրայելցի է բնակվում:
