«Վիրահայության և մասնավորապես Ջավախքի հայերի խնդիրների մասին առայժմ միայն բարձրաձայել է Սաակաշվիլիի «Միացյալ ազգային շարժումից» առաջադրված Դավիդ Բաքրաձեն, ով նախընտրական քարոզարշավի շրջանակներում այցելել է նաև Ջավախք»,- «Առաջին լրատվական»-ի հետ զրույցում ասաց Ախալքալաքի շրջանային ժողովի պատգամավոր Ֆյոդոր Թորոսյանը: Նա նաև նշեց, որ Ջավախքում նախագահի երեք թեկնածուներ՝ «Վրացական երազանք»-ից առաջադրված Գեորգի Մարգվելաշվիլին, «Դեմոկրատական շարժման» ղեկավար Նինո Բուրջանաձեն և «Միացյալ ազգային շարժում»-ից Դավիթ Բաքրաձեն, ունեն նախընտրական շտաբեր:
«Երբ Բաքրաձեն եկել էր շրջան՝ ընտրողների հետ հանդիպելու, նա բառացիորեն անդրադարձավ բոլոր այն հարցերին, որոնք մտահոգում են ջավախահայությանը, բոլոր խնդիրների նկատմամբ՝ ինչպես և սպասելի է, նա տվեց դրական պատասխան, որ եթե ինքը դառնա նախագահ՝ կանի առավելագույնը, որ բոլորն իրենց զգան այս երկրի հավասար քաղաքացի»,- ասաց նա:
Մեր զրուցակիցը հավելեց, որ բոլորն իրենց մոտ վստահ են, որ Բաքրաձեն և Բուրջանաձեն չեն ընտրվելու, և սա խաղի նման մի բան է. «Եթե երկրորդ փուլ լինի, կանցնեն, ըստ իս, Մարգվելաշվիլին և Բաքրաձեն, բայց դե նրանց համար այս շրջանն այնքան էլ էական չէ, ամեն ինչ լուծվելու է մեծ քաղաքաներում՝ Թբիլիսի, Քութայիսի և այլն, 20․000 ընտրողն այնքան էլ էական չի լինելու»:
Ֆ. Թորոսյանը նշեց, որ իրենք թեկնածուների նախընտրական ծրագրերի մասին ունեն ընդհանուր, մակերեսային տեղեկություն, և այդ երեք թեկնածուների ծրագրերի շեշտադրումն այն է, որ պետք է լավ հարաբերություններ ունենան բոլոր երկրների հետ. «Պետք է բարեկամ լինենք, լավ հարաբերություններ ունենանք և՛ Հայաստանի, և՛ Ադրբեջանի, և՛ Թուրքիայի, և՛ նաև Ռուսաստանի հետ՝ դա անգամ Բաքրաձեն է շեշտում: Նա չի ասում, թե խնդիրները չպետք է լուծվեն՝ Աբխազիա, Օսեթիա, քննադատեց վերջերս ռուսների՝ սահմանի առաջ բերելը, բայց ասաց, որ պետք է այնպիսի քաղաքականություն վարել, որ կարողանանք համագործակցել բոլորի հետ»:
