Արտաքին քաղաքականության և անվտանգության հարցերով ԵՄ գերագույն հանձնակատար Քեթրին Էշթոնը և Եվրամիության ընդլայնման և եվրոպական հարևանության քաղաքականության հարցերով հանձնակատար Շտեֆան Ֆյուլեն անհանգստություն են հայտնել Ադրբեջանում նախագահական ընտրությունների շեմին ակտիվիստների, իրավապաշտպանների, ընդդիմադիրների, անկախ մեդիայի դեմ կիրառվող ճնշումներից՝ հաղորդում է Turan գործակալությունը:
Եվրահանձնակատարների համատեղ հայտարարության մեջ անհանգստություն է արտահայտվում կասկածելի մեղադրանքների հիման վրա ակտիվիստների ձերբակալության և մարդու իրավունքների ոլորտում միջազգային չափորոշիչների խախտման կապակցությամբ:
Նշվում է, որ Եվրամիությունը Ադրբեջանի կառավարությունից ակնկալում է նշված ոլորտներում թափանցիկ և արդար հետաքննություն՝ իրավական ընթացակարգերի շրջանակներում:
Հայտարարության մեջ ընդգծվում է բարենպաստ պայմաններ ստեղծելու անհրաժեշտությունը՝ նախագահական ընտրություններն արդար մթնոլորտում անցկացնելու համար:
ԵՄ-ը կշարունակի հետևել Ադրբեջանում մարդու իրավունքների ոլորտում ստեղծված վիճակին և պատրաստ է աջակցել այս ոլորտում ստանձնած պարտավորությունների կատարմանը՝ ասվում է հայտարարության մեջ: