Լինել գլոբալ խաղացող՝ միշտ ավելի շահավետ է, լինել ինչ-որ միության խաղացող՝ ևս, բայց դրանք էապես տարբեր են: Հոկտեմբերի 3-ին Երևանում լրագրողների հետ ճեպազրույցում նման տեսակետ հայտնեց ՌԴ առևտրի և արդյունաբերության նախարարի տեղակալ, ՀԱՊԿ ռազմատնտեսական համագործակցության միջպետական հանձնաժողովի նորանշանակ նախագահ Գեորգի Կալամանովը՝ անդրադառնալով ՄՄ Հայաստանի անդամակցությանը:
«Մաքսային միությանը Հայաստանի անդամակցումը ձեռնտու է, Մաքսային միությունը միասնական տնտեսական տարածք է, որ նույնպես ձեռնտու է: Ես խոսում եմ՝ անգամ չելնելով Ռուսաստանի և Հայաստանի ջերմ հարաբերություններից: Կարծում եմ՝ այդ անդամակցումը կարող է փոխշահավետ լինել երկու երկրների համար»,- ասաց նա:
Կալամանովը չհամաձայնեց տեսակետին, որ ՄՄ անդամակցման հետևանքով Հայաստանը սուվերենությունը կկորցնի: Նրա համոզմամբ՝ Մաքսային միությունը ծրագիր է, որը վերաբերում է ոչ միայն Հայաստանին, այլև բոլոր երկրներին: «Մեզ համար կարևոր է նախագիծը, այն երկար ժամանակ կազմվում է և արդեն գրեթե համաձայնեցված է: Խնդիրը հետևյալն է ՝ պետք է պահպանել և զարգացնել ռազմական տեխնիկայի և ռազմական նշանակության տեխնիկայի արտադրության և վերանորոգման հնարավորությունները, որ մենք ունեցել ենք պատմական շրջանում, իսկ դա պետք է միասին անենք»,- ասաց նա՝ նկատելով, որ դա փոխադարձ գործընթաց է, երկկողմ երթևեկությամբ ճանապարհ:
Կալամանովը նշեց, որ անգամ չարժե քննարկել սուվերենության կորստի հարցը, քանի որ ՄՄ-ը միասնական տնտեսական տարածք է, միություն, որը տնտեսության հետ կապված սկզբունքների վրա է հիմնված, և սուվերենության կորստի մասին խոսք անգամ լինել չի կարող:
«Մաքսային միությունը երկրների տնտեսական պոտենցիալի զարգացման ուղղությամբ ջանքերի միավորման լուրջ հնարավորություն է, և մենք այստեղ լուրջ առաջընթաց ունենք: Ես տեղեկատվություն չունեմ միասնական արժույթի վերաբերյալ: Վերջին շրջանում մշակված են ՄՄ շրջանակներում համագործակցության մեխանիզմները: ՄՄ անդամակցումը, ինչ խոսք, գործընթաց է, որը ժամանակ է պահանջելու: Քանի որ համաձայնությունները շատ են, ես չգիտեմ՝ ինչ կերպ կկազմակերպվի այդ միջոցառումը, սակայն կարծում եմ՝ կան բոլոր հնարավորությունները՝ արագացված տեմպերով այդ աշխատանքը կատարելու համար»,- ասաց նա:
Թե Հայաստանի՝ ՄՄ անդամակցման դեպքում ինչ դեր կտրվի Լեռնային Ղարաբաղին՝ փոխնախարարը դժվարացավ նշել, միայն ասաց, թե ՄՄ շրջանակներում ինչ սկզբունքներ են: Նա նշեց, որ իրենց մոտ մաքսային ձևակերպումը տեղի է ունենում ՄՄ արտաքին մաքսակետերում: Միությանը Հայաստանի անդամակցման կոնկրետ ժամկետներ ևս Կալամանովը չնշեց, միայն նկատեց, որ պատահական չի ասում համաձայնությունների մեծ թվի մասին, դրանցից յուրաքանչյուրի դեպքում դեռ պետք է գալ փոխհամաձայնության:
