Թեև «Զվարթնոց» օդանավակայանի կլոր շենքը, ըստ սեփականատիրոջ՝ հայտնի գործարար Էդուարդո Էռնեկյանի, արժեք չունի և շահագործման ենթակա չէ, և ինքը ցանկություն ունի նորը կառուցելու, այնուամենայնիվ ճարտարապետներն ընդդիմանում են:
Ճարտարապետ Սաշուր Քալաշյանն «Առաջին լրատվական»-ի հետ զրույցում նշեց, որ «Զվարթնոցի» հին շենքը ճարտարապետական արժեք ունի, այն գրանցված էր հուշարձանների ցանկում, բայց ապօրինաբար այդ ցանկից հանվել է՝ վաճառելու նպատակով:
Ըստ ճարտարապետի՝ ոչ մի պայքար անօգուտ չէ և պետք է խնդիրը բարձրաձայնել նաև այս դեպքում:
Սաշուր Քալաշյանից հետաքրքրվեցինք՝ դիմե՞լ են արդյոք նորանշանակ ճարտարապետին, ի՞նչ կարծիք ունի նա այս խնդրի կապակցությամբ: Մեր զրուցակցի խոսքերով՝ քաղաքի գլխավոր ճարտարապետը նախ չինովնիկ է, նա կամակատար է, հրամաններ կատարող, ունի վերադաս, նրանք ազատ մարդիկ չեն, որ կարողանան իրենց կարծիքը համարձակորեն ասել:
«Իրենց կարծիքը ասելու համար նրանք նախ պետք է իրենց ղեկավարից հարցնեն՝ ասե՞լ, թե՞ ոչ, իսկ ինձ նման ազատ ու անկաշկանդ մարդիկ ամեն ինչ ասում են բացահայտորեն: Այնպես որ, այս հարցերը պետք չէ կապել ոչ թե նախագահի, վարչապետի կամ գլխավոր ճարտարապետի հետ: Եթե մենք հուշարձան ենք ճանաչել, դա նախագահը չի ճանաչել, այլ հանրությունը»,- հավելեց ճարտարապետը:
Ըստ նրա՝ ճարտարապետական կառույցները հանում են հուշարձանների ցանկից, որ գնորդն իր գույքով կաշկանդված չլինի, քանի որ եթե հուշարձան է, չի ուզում հետո խնդիրների առաջ կանգնել. «Սրանք էլ ասում են՝ հուշարձանների ցանկից հանենք, միայն թե վաճառենք: Սա զուտ բիզնես է, որի նպատակը միայն նյութական շահն է, իսկ մշակութային օգուտի մասին մտածող չկա»:
Անդրադառնալով այն կարծիքներին, թե շենքը ճարտարապետական արժեք չունի, շահագործման համար պիտանի չէ, Սաշուր Քալաշյանը նշեց, որ մշակութային արժեքը չի որոշվում ֆիզիկական վիճակով, այլ՝ գեղագիտական իմաստով: «Արտերկրում այս կարգի օբյեկտները այդքան հեշտ չեն վաճառում, իսկ վաճառելուց էլ այնպիսի պայմաններ են դնում, որ նա իրավունք չունի նույնիսկ փոշին վրայից մաքրի»:
Նա հիշեցրեց, որ օդանավակայանի շենքը քանդելու հարցը դրվեց վերջերս, ինչպես մեկ տարի առաջ բարձրացավ ԱԳՆ շենքի վաճառքի հարցը, ինչը ինքնըստինքյան աբսուրդ է, որովհետև դա վաճառքի ենթակա օբյեկտ չէ:
Ճարտարապետը մտահոգություն հայտնեց, որ գնալով էլ ավելի ենք ջնջում մեր մշակութային արժեքները, մեր ազգային արժեքները և աստիճանաբար վերածվում ենք տեղում դոփող ամբոխի:
