ՀԱՊԿ-ում հրապարակայնությունը քիչ է, և թե ինչ է դրա ներսում կատարվում՝ հաճախ հայտնի չէ: «ՀԱՊԿ-ն ու Եվրասիայի անվտանգությունը» թեմայով այսօր կայացած Երևան-Մոսկվա տեսակամուրջի ժամանակ այս մասին ասաց «Խելամիտ ինտերնետ» հիմնադրամի գլխավոր տնօրեն Վլադիմիր Մամոնտովը` միաժամանակ հայտարարելով, որ ամեն դեպքում՝ կառույցը անվտանգության մեծ երաշխավոր է:
«Միջազգային հետազոտությունների ինստիտուտ» վերլուծական կենտրոնի տնօրեն Անդրեյ Կազանցևն իր հերթին նշեց, որ ՀԱՊԿ-ը միշտ էլ լավ է աշխատել և նույն տեմպերով կաշխատի նաև ապագայում:
Պատասխանելով լրագրողներից մեկի հարցին` ինչո՞ւ է ՀԱՊԿ-ն իր զեկույցներում ու համաժողովներում ամեն կերպ խուսափում ԼՂ խնդրի արծարծումից, Կազանցևը նշեց. «Ռուսաստանում բավական շատ են մարդիկ, ովքեր ակտիվորեն քննարկում են ղարաբաղյան հարցը՝ չնայած այն փաստին, որ խնդրից հաճախ խուսափում են վերլուծաբանները»
Տեսակամուրջի մյուս մասնակցի՝ Կասպիական համագործակցության ինստիտուտի գլխավոր տնօրեն Սերգեյ Միխեևի կարծիքով՝ անտրամաբանական են այն կարծիքները, թե ՀԱՊԿ-ը անկարևոր խնդիրներով զբաղվող կառույց է:
«ՀԱՊԿ-ը միակ կազմակերպությունն է, որ զբաղվում է տարածաշրջանային ռազմական հարցերով: Ապագայում նա դեռ շատ անելիք ունի»,- ասաց նա:
Երևանյան բանախոսներից՝ «Նորավանք» գիտակրթական հիմնադրամի գործադիր տնօրեն Գագիկ Հարությունյանն էլ նկատեց, որ ծայրահեղականության դեմ պայքարը հավասարապես կարևոր է ՀԱՊԿ անդամ բոլոր երկրների համար: «Կառույցի բոլոր անդամ երկրները պետք է ամուր կապեր հաստատեն միմյանց հետ»,- ասաց նա:
ՀՀ ՊՆ ազգային ռազմավարական հետազոտությունների ինստիտուտի պետ, գեներալ-մայոր Հայկ Քոթանջյանը նշեց, որ ՀԱՊԿ անդամ երկրների՝ հունիսին կայացած համաժողովի ընթացքում դիտարկվել են ուժերի կազմին, գործունեության բովանդակությանը, կառավարման օպտիմալ մշակմանն ու օդուժի ստեղծմանը առնչվող հարցեր:
Լուսանկարը՝ PanARMENIAN Photo-ի
