ԱԺ հինգերորդ գումարման չորրորդ նստաշրջանը մեկնարկել է: Սեպտեմբերի 30-ի նիստին ներկա են 111 պատգամավոր: ԱԺ պատգամավոր Նիկոլ Փաշինյանը նիստի սկզբում մտահոգություն հայտնեց ԱԺ պատգամավոր Զարուհի Փոստանջյանի հետ Սյունիքի մարզում կատարված միջադեպի առնչությամբ:
«Սյունիքի մարզի Լիճք գյուղի մոտ տեղի է ունեցել անհասկանալի միջադեպ, որն առնչվում է ԱԺ պատգամավորի: Սահմանապահ զորքերի ներկայացուցիչներն ու ФСБ գրությամբ հագուստներով մարդիկ անցագրային կետ են սահմանել ավտոմայրուղու վրա, կատարել են գործողություններ, որոնք հատուկ են և իրավասու են կատարել բացառապես հայկական իրավապահ մարմինների ներկայացուցիչները: Նրանց պահվածքն անհարգալից շեշտադրումներ էր պարունակում»,- ասաց Փաշինյանը: Նա հետաքրքրվեց՝ արդյոք ԱԺ ղեկավարը պահանջել, խնդրել կամ ստացե՞լ է տեղեկատվություն՝ ինչ իրավունքով են սահմանապահ զորքերի ներկայացուցիչները պետական սահմանից այդքան հեռու անցագրային կետ սահմանել: ԱԺ նախագահ Հովիկ Աբրահամյանը տեղեկացրեց, որ հեռախոսով զրուցել է Փոստանջյանի հետ, տեղեկացել, որ կա փաստաթուղթ: ԱԺ նախագահը խոստացավ ընդմիջման ժամին փորձել հասկանալ կատարվածի պատճառները:
«Օրենքը պետք է գործի բոլորի համար՝ բոլոր քաղաքացիների նկատմամբ: Եթե կլինեն ոտնձգություններ մեր գործընկերոջ նկատմամբ, մենք համապատասխան գնահատական կտանք»,- ասաց Հովիկ Աբրահամյանը:
