Հայ ազգային կոնգրեսը շարունակում է փաստաբանություն անել Հայաստանի երկրորդ նախագահ Ռոբերտ Քոչարյանի համար: Չենք կարող ասել ում պատվերով է արվում քոչարյանական քարոզչությունը կամ ինքը՝ Քոչարյանը տեղյա՞կ է արդյոք, որ Հայաստանի քաղաքական դաշտում իր PR-ով ժամանակ առ ժամանակ զբաղվելու է հենց Կոնգրեսը:
Անցյալ շաբաթ հանրային քննարկումներից մեկի ժամանակ ունեցած ելույթի ժամանակ ՀԱԿ համակարգող Լևոն Զուրաբյանը հայտարարել էր, որ «Տեր- Պետրոսյանը և Քոչարյանը [իրենց կառավարման տարիներին] պահպանում էին հավասարակշռված քաղաքականություն, իսկ Սարգսյանը՝ ոչ: Ամենևին կարիք չենք տեսնում այստեղ խոսել Քոչարյանի կառավարման տարիների արտաքին քաղաքական ձախողումների մասին և ոչ էլ անհրաժեշտություն ենք տեսնում խոսել այդ քաղաքականության արդյունքում երկրի արձանագրած անդառնալի կորուստների մասին:
Եթե Կոնգրեսը շարունակում է Քոչարյանի համար փաստաբանություն անել, նշանակում է, որ Կոնգրեսը առաջիկա ներքաղաքական զարգացումներում դեռ հույսեր է փայփայում «Բարգավաճ Հայաստան»-ի և անձամբ Քոչարյանի հետ համագործակցության առումով:
Դժվար է ասել, թե ինչ ռացիոնալ հաշվարկների վրա են հիմնվում ՀԱԿ-ի ակնկալիքները Քոչարյանից և ԲՀԿ-ից: Այստեղ այլ ակնկալիք լինել չի կարող, քան պարզապես որքան հնարավոր է թանկ գնով վաճառել սեփական փաստաբանությունը Քոչարյանին և ԲՀԿ-ին: Սակայն, մյուս կողմից, Քոչարյանի մասով ՀԱԿ-ի գնահատականները կարող են նաև, այսպես ասած, քաղաքական հաշվարկի այլ տեսանկյան հարց լինել Կոնգրեսի համար: Ըստ այդմ, հայտնի է, որ Կոնգրեսում շարունակում են աննպատակահարմար համարել ԲՀԿ-ի հետևում Քոչարյանի ականջները տեսնելը: Այս իսկ պատճառով, եթե անգամ առաջիկա զարգացումների մեջ ՀԱԿ-ը ոչ մի ակնկալիք ԲՀԿ-ից այլևս չունի, նա, միևնույն է, այսօր անկարող է «Բարգավաճ»-ի մասին ասել ողջ ճշմարտությունը, քանի որ այդ դեպքում կհայտնվի ԲՀԿ-ի քարոզչական գրոհի ներքո, իսկ դա այսօր Կոնգրեսի համար վտանգավոր բան է:
Միևնույն ժամանակ, իհարկե անկասկած է, որ, չտեսնելով Քոչարյանին ԲՀԿ-ի թիկունքին, Լևոն Տեր-Պետրոսյանը փորձում է Սերժ Սարգսյանին նախազգուշացնել, թե սեպտեմբերի 3-ին արված արտաքին քաղաքական շրջադարձից հետո ամենևին չի խանգարի Քոչարյանին վերադառնալ իշխանության և հեռացնել Սերժ Սարգսյանին, եթե Սարգսյանն էլ շարունակի իրեն չնկատել քաղաքական դաշտում այնպես, ինչպես ինքը ԲՀԿ-ում չի նկատում Քոչարյանին:
Լուսանկարը՝ PanARMENIAN Photo-ի
