Երևանյան շրջիկ «Շապիտո» կրկեսը սեպտեմբերից իր այցելուների համար գնային ճկուն քաղաքականություն է կիրառում. տոմսերի արժեքը, ըստ այդմ, կարժենա 1500-3000 դրամ: Այս մասին այսօր կայացած մամլո ասուլիսի ժամանակ հայտարարեց «Շապիտո»-ի գեղարվեստական ղեկավար Գևորգ Գրիգորյանը:
Նրա խոսքով՝ ինքը մինչ այժմ ապրել ու աշխատել է Պրահայում և երևանյան ստացիոնար կրկեսի պայթեցումից հետո որոշել է աշխատանքային գործունեությունը ժամանակավորապես ծավալել հայրենիքում: «Ցավում եմ, որ հայ հանդիսատեսը տարիներ շարունակ կրկեսային լավ դերասաններ չի տեսել: Օր օրի մարդկանց ճաշակն ընկնում է: Երբ տեղական կրկեսում 15 տարի, ասենք, վարժեցրած արջեր չեն լինում, իհարկե, դա շատ վատ է: Մեր կրկեսում աշխատում են արտասահմանցի, 30 տարվա աշխատանքային փորձով արտիստներ, կենդանիներից ունենք շնիկներ, կապիկներ, արջեր ու սողուններ»,- ասաց նա՝ միաժամանակ հավելելով, որ 700 տեղանոց իրենց վրանային կրկեսը պատրաստվում է շրջագայությունների մեկնել Հայաստանի շրջաններ ու Արցախ: «Նոր ծրագիրը կներկայացնենք մինչև Նոր տարի, այնուհետ կաշխատենք այլ ծրագրով: Կաշխատենք նաև երևանյան ստացիոնար կրկեսի գործարկվելուց հետո»,- նշեց ծաղրածու Գևորգ Գրիգորյանը՝ հիշեցնելով, որ Եվրոպայում շրջիկ կրկեսները ավելի քան 400 տարվա պատմություն ունեն:
Ասուլիսի մյուս բանախոս, ուկրաինացի կրկեսային արտիստ Անդրեյ Կոլյուչնին իր հերթին հավելեց, որ Ուկրաինայում 22 ստացիոնար կրկեսներին զուգահեռ՝ գործում են հարյուրից ավելի շրջիկ կրկեսներ: «Իսկ որոշ երկրներում կրկեսը մահանում է, մարդիկ կրկես գնալու ժամանակ ու տրամադրություն չունեն»,- ասաց նա՝ շեշտելով, որ ԽՍՀՄ փլուզումից հետո Երևան կրկեսային որակյալ խմբեր չեն եկել:
