«Սասնա ծռերի» անդամ Վարդան Գերավետյանի շահերի պաշտպան Դավիթ Գյուրջյանը տեղեկացրել է, որ «ծռերն» այսօրվանից հացադուլ են սկսել: Ֆորմալ առումով` հացադուլավորների չորս պահանջներից միայն մեկն է վերաբերում դատավարությանը, սակայն ակնհայտ է, որ «ծռերի» ծայրահեղ քայլը հենց խոցելի արդարադատության հետևանք է և արձագանք է այն լարվածության, որի ականատեսն ենք դատարանի դահլիճում և դրանից դուրս:
Քանիցս արձանագրել ենք, որ նման որակի դատավարությամբ ոչ միայն չի բացահայտվելու այս հանցագործության ամբողջական պատկերը, այլ ավելի է մեծանալու լարվածությունը` ճանապարհ բացելով «ծռության» նոր դրսևորումնրրի համար: Մյուս կողմից` «ծռերը» դատարանին որևէ պահանջ չեն ներկայացնում, նաև իշխանությունների առջև հանդես չեն գալիս այնպիսի օրակարգով, որը արդարացված կհամարեր հացադուլը: Օրինակ` ակնհայտ է, որ հացադուլով քաղկալանավոր չեն դառնում և պարզ չէ, թե ում է հասցեագրված իրենց քաղկալանավոր ճանաչելու «ծռերի» պահանջը: «Հաց բերող» Արթուր Սարգսյանի մահվան հանգամանքները պարզելու պահանջն առնվազն ժամանակավրեպ է, որովհետև ֆորմալ առումով ընթանում է քննություն, և իշխանությունները հանգիստ հարցադրումը կվերահասցեագրեն իրավական դաշտ:
«Նուբարաշեն» ՔԿՀ-ում կալանավորված «Սասնա ծռերի» անդամներին, տեղափոխել նրանց ընդհանուր բանտախցերից առանձնացված բանտախցեր։ Պատճառաբանությունը հետևյալն է՝ առաջին իսկ օրերից «Նուբարաշեն» ՔԿՀ-ում շրջանառության մեջ դրվեց այն միտքը, թե իբր իշխանությունները ուզում էին համաներում հայտարարել, սակայն «Սասնա ծռերի» պատճառով չեն իրականացնում, այդպիսով փորձելով թշնամանք սերմանել «Սասնա ծռերի» անդամների և մյուս կալանավորված անձանց միջև»,-ասված է հացադուլավոր «ծռերի» հայտարարության մեջ և սա նրանց ամենատրաբանական պահանջն է, որովհետև մեր տիպի երկրներում օրինաչափություն է, որ իշխանությունները կրիմինալին օվտագործում են իրենղ ընդդիմախոսների դեմ:
Ամեն դեպքում, հայտարարված հացադուլը սթափության կոչ պետք է լինի արդարադատության համար: Եթե նույնիսկ «ծռերը» ծանր հանցագործներ են, գործում է անմեղության կանխավարկածը, և նրանք ունեն պաշտպանվելու և օրինական դատավարության իրավունք:
