Բաքվի դատարանը «Դավայ, դա սվիդանյա» հայտնի ինտերնետ-հոլովակի հեղինակ Գիլալ Մամեդովին դատապարտել է 5 տարվա ազատազրկման՝ խիստ ռեժիմի գաղութում՝ պետական դավաճանության ու ազգային, ռասայական, սոցիալական ու կրոնական ատելություն սերմանելու մեղադրանքով: Այս մասին հայտնում է ՌԱՊՍԻ-ն:
Հետաքննությունը կարծում է, որ Մամեդովը համագործակցել է իրանական հատուկ ծառայությունների հետ:
Նրան մեղավոր են ճանաչել նաև «խոշոր չափերի հասնող թմրամիջոցների անօրինական պահման, արտադրության, ձեռք բերման, տեղափոխման» հոդվածով:
Մամեդովի փաստաբանն արդեն հայտարարել է, որ բողոքարկելու է վճիռը, քանի որ որոշումը քաղաքականապես մոտիվացված է:
Լրագրող ու թալիշերենով հրատարակվող «Թալիշի ձայն» թերթի գլխավոր խմբագիր Մամեդովը ձերբակալվել է անցած տարվա հունիսին:
