Եվրամիության նախարարների կոմիտեի Լիտվայի նախագահության շրջանի հիմնական սպառնալիքները կապված են Արևելյան գործընկերության ծրագրում ընդգրկված երկրների հանդեպ Ռուսաստանի գործողությունների հետ: «Ազատություն» ռադիոկայանի փոխանցմամբ՝ չորեքշաբթի օրը ասել է Լիտվայի խորհրդարանի արտաքին հարաբերությունների հանձնաժողովի նախագահ Բենեդիկտոս Յոդկան:
Լիտվայի նախագահությունը շարունակվելու է մինչև տարեվերջ:
«Բոլոր սպառնալիքները կապված են նոյեմբերին կայանալիք Արևելյան գործընկերության գագաթնաժողովի հետ: Եվրամիության այդ ծրագրի նպատակն է վեց գործընկերներին ժողովրդավարությամբ, մարդու իրավունքների պաշտպանությամբ, արդարադատությամբ մոտեցնել Եվրամիությանը», – լրագրողներին ասել է հանձնաժողովի նախագահը՝ նշելով, թե որքան մոտենում է գագաթնաժողովը, այնքան հստակ է դառնում, որ Վիլնյուսում, ամենայն հավանականությամբ, Եվրամիության և Ուկրաինայի միջև կստորագրվի Ասոցացման համաձայնագիրը: Բավական լավ են գործերը Մոլդովայի և Վրաստանի հետ, ասել է Բենեդիկտոս Յոդկան՝ միաժամանակ նշելով, թե որքան մոտենում են Եվրամիության տեսանկյունից դրական որոշումները, այնքան ուժեղանում են հարևան երկրների նկատմամբ շանտաժները:
Նա բերել է Հայաստանի օրինակը՝ ասելով․ – «Հայաստանը միանում է Ռուսաստանի հետ Մաքսային միությանը, չնայած Արևելյան գործընկերության ծրագրի առաջատար երկրներից մեկն էր, սակայն հիմա դուրս մնաց այդ վեց երկրների ցանկից հենց ռուսական շանտաժի պատճառով»:
«Հայաստանի տնտեսությունը շատ է կախված Ռուսաստանից, իր տարածքում տեղակայված է ռուսական ռազմակայան», – նշել է Լիտվայի խորհրդարանի արտաքին հարաբերությունների հանձնաժողովի նախագահը՝ մեկ անգամ ևս շեշտադրելով, որ սպառնալիքները շատ հստակ են՝ խանգարել Արևելյան գործընկերության գագաթնաժողովին՝ դրան են ուղղված բոլոր հիմնական սպառնալիքները:
Լիտվայի խորհրդարանի արտաքին հարաբերությունների հանձնաժողովի փակ նիստից հետո հանձնաժողովի նախագահի ու լրագրողների զրույցի մասին հաղորդում է «Ինտերֆաքս» լրատվական գործակալությունը: Նիստում Լիտվայի արտգործնախարարության և Ազգային անվտանգության դեպարտամենտի ներկայացուցիչների մասնակցությամբ քննարկվել են Եվրամիությունում Լիտվայի նախագահության շրջանի սպառնալիքները:
Հիշեցնենք՝ նախատեսվում է, որ Վիլնյուսի գագաթնաժողովում Եվրամիության և Ուկրաինայի միջև կստորագրվի Ասոցացման և ազատ առևտրի համաձայնագիրը, իսկ Վրաստանն ու Մոլդովան կնախաստորագրեն համապատասխան համաձայնագրերը:
