Կառավարության, ՄԱԿ-ի արդյունաբերական զարգացման կազմակերպության և Հայաստանի փոքր և միջին ձեռնարկատիրության զարգացման ազգային կենտրոն հիմնադրամի միջև համաֆինանսավորման ծրագրի նախագիծն արժանացել է հավանության: «Ձեռնարկատիրական ծրագիր Հայաստանի երիտասարդության համար. Աջակցություն երիտասարդ ձեռներեցներին» ծրագիրը սկսվել է 2013թ.-ի մարտին, ընդհանուր տևողոթյունը 44 ամսի է, իսկ ընդհանուր ֆինանսավորումը` 768 հազար եվրո: Բացի դրանից ևս 200 հազար եվրո կներդնի նաև գործընկեր գործակալությունը:
Այս ծրագրի հիմնական նպատակն է աջակցել երիտասարդության կողմից ղեկավարվող ձեռնարկությունների ստեղծմանն ու ընդլայնմանը` դրանով իսկ նպաստելով տեղական մասնավոր հատվածի կայուն զարգացմանը:
Միայն պետք է նշել, որ 2010թ.-ին երիտասարդության շրջանում (15-24 տարեկան) գործազրկության մակարդակը հասել է մինչև 38.8%, ինչը նշանակում է, որ երիտասարդների գործազրկության խնդրի լուծումը շարունակում է մնալ լուրջ: Հաշվի առնելով Հայասատանի աշխատաշուկայի կլանման սահմանափակ կարողությունները, երիտասարդության շրջանում ձեռնարկատիրության զարգացումը կենսունակ տարբերակ է աշխատատեղերի ստեղծման համար: Ծրագիրը կաջակցի երիտասարդ կանանց, տղամարդկանց և ընտանիքներին հիմնելու իրենց սեփական բիզնեսը:
ՓՄՁ ԶԱԿ-ի հետ միասին ծրագրով կստեղծի Երիտասարդների ձեռնարկատիրական զարգացման շրջանառու ֆոնդ, ինչպես նաև կմատուցի ոչ ֆինանսական այնպիսի ծառայություններ, ինչպիսիք են ձեռնարկատիրական հմտությունների ուսուցումը, խորհրդատվությունները և անհրածեշտ տեխնիկական աջակցությունը:
