Սերժ Սարգսյանն այսօր առավոտյան աշխատանքային այցով մեկնել է Տավուշի մարզ։ Նույն օրը պաշտպանության նախարարության Դիլիջանի «Լեռնային Հայաստան» առողջարանում Սարգսյանը հարցազրույց է տվել «Արմենիա» հեռուստաընկերության «Ռ-Էվոլյուցիա» հաղորդաշարին:
Ենթադրվում է, որ Սարգսյանն այդ հարցազրույցում ինչ-որ կարևոր և սկզբունքային բան է ասելու, որովհետև վերջին շրջանում օրինաչափություն է դարձել, որ իր կարևոր քաղաքական ուղերձները Սարգսյանն անում է հենց առաջնագծից` զինվորական համազգեստով: Իհարկե, շատերի մոտ կարող է հարց առաջանալ, թե ինչո՞ւ է Սարգսյանն առաջնագիծ հասնում հայտարարություն անելու համար, եթե նույն բանը կարող անել Երևանում` ավելի կոմֆորտ պայմաններում: Խնդիրը թերևս պետք է փնտրել համակարգի ներսում ընթացող գործընթացների համատեքսում, որովհետև հիմա Սերժ Սարգսյանի բոլոր քայլերը կառուցված են հենց այդ տրամաբանությամբ: Նա օգտագործում է իր հաղթաթուղթը, այն հանգամանքը, որ երկրի անվտանգության, պաշտպանության հարցերում այլընտրանք չունի, ստեղծում է հանրային կարծիք, որ մի ամբողջ պետության, ժողովրդի անվտանգության միակ երաշխավորն է, որովհետև, օրինակ, իր պոտենցիալ մրցակից Կարեն Կարապետյանն այս հարցերի շուրջ անգամ մեկ հոդաբաշխ նախադասություն չի արտասանել: Մյուս կողմից` Սերժ Սարգսյանն իր ձեռքերը լվացել է տնտեսությունից, որի ձախողման ողջ պատասխանատվությունն ընկնում է Կարեն Կարապետյանի վրա, որովհետև, ի վերջո, նա է խոստացել ութ միլիարդ ներդրումը, կամ քարոզարշավի ժամանակ ցուցանիշային խոստումներ տվել ընտրողներին:
Չի բացառվում, իհարկե, որ Սարգսյանի հարցազրույցի կամ կարևոր խոսքի առիթը ԼՂ կարգավորման գործընթացն է: Զինվորական հագուկապն ու «Լեռնային Հայաստան» առողջարանում հարցազրույց տալը կարող են տեղավորվել նաև այս տրամաբանության մեջ: Չի բացառվում, որ Նալբանդյան-Մամեդյարով հանդիպումը ոչ միայն առաջընթաց չի գրանցել, այլ նաև ձախողվել է, և պաշտոնական Երևանն իր դիրքորոշումը կարծրացնելու խնդիր ունի:
Ինչ կարևոր ասելիք ուներ Սարգսյանն այսօր` կիմանանք «Ռ-Էվոլյուցիա» հաղորդաշարի հերթական կամ հատուկ թողարկման ժամանակ:
