Որևէ արտաքին քաղաքական նախաձեռնություն չի կարող վտանգել Հայաստանի անվտանգությունը, վերածվել սպառնալիքի: Սեպտեմբերի 25-ին լրագրողների հետ հանդիպմանը նման տեսակետ հայտնեց Քրիստոնեա-դեմոկրատական միության նախագահ, ԱԺ ՀՀԿ-ական պատգամավոր Խոսրով Հարությունյանը՝ անդրադառնալով Մաքսային միությանն անդամակցելու Հայաստանի որոշմանը:
«Պետք է հասկանալ՝ ԵՄ հետ տնտեսական հարաբերությունների սերտացումն ի՞նչ էր տալու մեզ: Ակնհայտորեն, թե՛ Մաքսային միությունը, թե՛ Ասոցացման համաձայնագիրը բացառապես տնտեսական նպատակներ էին հետապնդում: ԵՄ-ն նախընտրելու դեպքում մենք կարող էինք ներդնել տնտեսական մոտեցումներ, որոշումներ կայացնելու այնպիսի փորձառություն, որ հատուկ է Եվրոպային»,- ասաց նա:
Խ.Հարությունյանը ուշադրություն հրավիրեց այն փաստի վրա, որ Ադրբեջանը, օգտագործելով նավթադոլարները, հսկայական գումարներ է ներդնում իր բանակի ռազմատեխնիկական հագեցվածության համար: Բանախոսի համոզմամբ՝ այս դեպքում պատերազմի սպառնալիքները շատ ավելի շոշափելի կդառնան, ուստի անհրաժեշտություն է առաջանում մեր բանակը ևս նույն կերպ զինելու, իսկ դրա ճանապարհը մեկն է՝ հզոր տնտեսություն: Եվրոպական ուղղությունը, ըստ Հարությունյանի, մեզ համար ներկայանում էր որպես տնտեսությունը զարգացնելու նոր հնարավորությունների աղբյուր, բայց զարգացումները ցույց տվեցին, որ այն դարձավ նաև նոր սպառնալիքների աղբյուր:
«Ռուսաստանն իր առջև լուրջ աշխարհաքաղաքական ազդեցություն ունենալու խնդիր դրեց. դա սկսեց նախկին ԽՍՀՄ տարածքից: Հայաստանի անվտանգությունն աներկբա է դառնում ՄՄ անդամակցման դեպքում, մենք նաև դինամիկ զարգացող տնտեսություն կարող ենք ձևավորել դրսի շուկայի համար»,- ասաց նա:
Մաքսային միության անդամ երկրների տարածքում, ըստ բանախոսի, մաքսային քաղաքականությունը վերազգային կառույցների որոշումներով է իրականացվելու: Միությունում մաքսային քաղաքականությունը վարում են, որ հնարավոր լինի խթանել տեղական արտադրությունը: Սա աշխատանք է, որ պիտի կատարվի», սակայն, ըստ Խ.Հարությունյանի, «մենք կանգնած ենք ճակատագրական-ողբերգական իրադարձությունների առջև: Ճակատագրական մի բան կա՝ Հայաստանի և Արցախի անվտանգություն»: Նրա համոզմամբ՝ ցանկացած քաղաքական որոշում գին ունի. «Եթե Հայաստանի նախագահը երեք տարի առաջ ասեր՝ «Ոչ մի Մաքսային միություն, ես ընտրում եմ ԵՄ-ն», կարծում եք՝ այս բոլոր պայմանավորվածությունները կլինեի՞ն:
Ռուսաստանը պատրաստ եղավ ՄՄ անդամակցման համար վճարել: Նույնն է Եվրոպայի դեպքում»,- ասաց նա:
Ներկայումս Հայաստանը պիտի շարժվի փոքր քայլերի քաղաքականությամբ: Եվրոպայի հետ համագործակցության դուռը փակ չէ, բանախոսը վստահ է՝ պետք է կծել այնպիսի կտոր, որ կարողանան կուլ տալ: Խոսրով Հարությունյանը կարծիք հայտնեց, որ մինչև նոյեմբեր, այնուամենայնիվ, ԵՄ-ն Հայաստանի հետ կստորագրի ինչ-որ հուշագիր: Նրա խոսքով՝ խորհրդարանը այս հարցը չի շրջանցել, պարզապես նրան սահմանադրորեն վերապահված լիազորությունների իրացման փուլը դեռևս չի հասել, իսկ հանրաքվեի հարցում նա խորհուրդ է տալիս չշտապել:
Լուսանկարը՝ PanARMENIAN Photo-ի
