Երեկ Սերժ Սարգսյանն գլխավոր դատախազությունում մասնակցել է դատախազության աշխատողի օրվան նվիրված հանդիսավոր նիստին, որտեղ ասել է. «Ես ուղղակի խնդրում եմ՝ սատարե՛ք Հայաստանի Հանրապետության կառավարությանը, սատարե՛ք ինձ՝ մեր երկրից արմատախիլ անելու բոլոր հոռի երևույթները, որոնք պատժելի են օրենսդրությամբ»: ԱԺ ՀՀԿ խմբակցության ղեկավար Վահրամ Բաղդասարյանի խոսքերով՝ չկա մի հասարակություն, մի երկիր, որտեղ հոռի երևույթներ չլինեն, բոլորս պետք է տանենք այնպիսի քաղաքականություն, որ դրանք միտում ունենան վերացման:
«Մենք ունեցել ենք բավականին բացթողումներ, և դա եղել է պրոֆեսիոնալիզմի պակասն ըստ ոլորտների: Ընդհանուր առմամբ չէր կարող լինել մի ոլորտ, որտեղ, երբ գալիս են նոր իշխանության, այդ նոր իշխանությունում կարող էին լինել կադրային խնդիրներ: Սերնդափոխությունը պետք է լինի ներդաշնակ, հնի փորձը վերցնել և շարժվել առաջ»,- ասաց Վահրամ Բաղդասարյանը:
Սերժ Սարգսյանն իր ելույթում նաև նշել է. «Անարդարությունը մեր թիվ մեկ թշնամին է, և մենք պատերազմ ենք հայտարարել անարդարությանը»: Հարցին՝ ինչու այս տարիներին որևէ քայլ չի արվել, Վահրամ Բաղդասարյանն արձագանքեց. «Միանգամից հնարավոր չէ որևէ բան անել, շատ վտանգավոր և ռիկային է արմատախիլ անել ամեն ինչ։ Երեք նախագահների ժամանակ այս մոտեցումներն ըստ էության փոփոխություն չեն կրել»:
Նրա խոսքերով՝ անկախության 25-30 տարին բավական տարիք է, և պետք է ռեֆորմատիկ քայլերի գնալ, ինչին գնում է Սերժ Սարգսյանը. համակարգային փոփոխությոններից մինչև մոտեցումների փոփոխություններ, ինչը նշանակում է տեմպերի արագացում:
Հարցազրույցն ամբողջությամբ՝ տեսանյութում: