Կուտակային կենսաթոշակների ակտիվները կառավարող ընկերությունների կողմից կառավարվում է ավելի քան 60 միլիարդ դրամ գումար: Ազգային ժողովի առողջապահության և սոցիալական հարցերի ու ֆինանսավարկային և բյուջետային հարցերի մշտական հանձնաժողովների համատեղ նիստում ՀՀ 2016 թ. պետական բյուջեի հաշվետվության քննարկման ժամանակ այս մասին ասաց ՀՀ աշխատանքի և սոցիալական հարցերի նախարար Արտեմ Ասատրյանը՝ պատասխանելով «Ելք» խմբակցության քարտուղար Գևորգ Գորգիսյանի հարցին:
«Թե ինչ արդյունքներ է տվել այս համակարգի ներդրումը, ես կարծում եմ, որ ավելի մասնագիտական պատասխան կտան մեր գործընկերները ֆինանսների նախարարությունից և Կենտրոնական բանկից: Ես վստահաբար կարող եմ ասել, որ եթե մենք այսօր գործ ունենք նաև տոկոսադրույքների որոշակի իջեցման հետ, եթե մենք գործ ունենք կյանքի որոշակի մատչելիության հետ, նաև այդ միջոցներն են ազդեցություն ունեցել»,- նշեց նախարարը:
Նա հավելեց, որ այդ գումարները ներդրված են ՀՀ-ում, օրենքով պահանջը կա՝ որքանը կարող է ներդրվել ՀՀ-ում, որքանը՝ դրսում: «Կուտակային համակարգի ներդրումը երկարաժամկետ խնդրի լուծման ապահովման տեսանկյունից այլընտրանք չունի»,- եզրափակեց Արտեմ Ասատրյանը:
