ՀՀ ազգային վիճակագրական ծառայության գների վիճակագրության և միջազգային համադրումների բաժնի պետ Գուրգեն Մարտիրոսյանը գնագոյացման և գնաճի վերաբերյալ վերջին հինգ ամիսների տվյալների կապակցությամբ հրաժարվեց որևէ գնահատական տալ կամ վերլուծություն կատարել՝ նշելով, որ իրենց գործը միայն փաստագրելն է և ստացված թվերը ներկայացնելը:
Մասնավորապես, լրագրողները հետաքրքրվում էին, թե դեռ ինչքան է սպառողական շուկայում շարունակվելու այս գնաճը, օրինաչա՞փ է նման պատկերը, թե՞ ոչ, այն դեպքում, երբ հաճախ գնաճը պայմանավորում են միջազգային շուկայում տվյալ ապրանքատեսակի թանկացմամբ, սակայն նույնիսկ դրանց էժանանալուց հետո մեզ մոտ պատկերը, միևնույն է, չի փոխվում, կամ այլ երկրներում, մասնավորապես ԱՊՀ-ում, Եվրոպայում, գնաճին զուգահեռ բարձրացվել են նաև աշխատավարձերը, իսկ մեզ մոտ կամ պատկերը նույնն է, կամ աշխատավարձի բարձրացումները կազմել են չնչին տոկոսներ:
Որոշ հարցերի վերաբերյալ մեզ, այնուամենայնիվ, հաջողվեց պարզել Գուրգեն Մարտիրոսյանի կարծիքը:
– Պարոն Մարտիրոսյան, դուք նշում եք, որ ինչքան ապրանքի առաջարկը շատ լինի, գներն ավելի ցածր կլինեն: Մեր հանրապետությունում տարին մի քանի անգամ, հատկապես որոշ տոն օրերի, պահանջարկ ունեցող ապրանքի պակաս չի լինում, սակայն գները կտրուկ բարձրանում են: Ինչո՞վ է դա պայմանավորված: Կարծես առաջարկի և պահանջարկի նոր կանոններ են մեզ մոտ գործում:
– Դա կախված է մեր մենթալիտետից, տվյալ միջոցառմանը պատրաստվելու ցանկությունից, հնարավորւթյուններից: Վաճառողը, ապրանքի տերը ցանկանում է ինչքան հնարավոր է՝ բարձր գնով վաճառել, որովհետև պահանջարկ կա:
– Իսկ ո՞վ պետք է վերահսկի վաճառողների նման ցանկությունները և համապատասխան քայլեր ձեռնարկի:
– Դրա համար վերահսկող կազմակերպություններ կան` հանձինս մենաշնորհային հանձնաժողովի:
– Ինչպե՞ս եք գնահատում այդ հանձնաժողովի աշխատանքը:
– Գիտեք, կոռեկտ չի լինի, որ ես պատասխանեմ:
– Որպես ՀՀ քաղաքացի պատասխանեք:
– Փորձ անում են որոշ բան անել, բայց եթե այդպես վերցնենք` ցանկալի կլիներ ավելի լավ աշխատեին: