Անցած կիրակի Նոր Հաճնում քաղաքապետի ընտրություն էր, ինչի արդյունքում վերընտրվեց գործող համայնքապետ Գագիկ Մաթևոսյանը: Նա ինքնաառաջադրվել էր, թեկուզ վայելում էր ԲՀԿ-ի, իսկ ոչ հրապարակային՝ նաև ՀՀԿ-ի աջակցությունը:
Պայքարը երկու թեկնածուների միջև էր: Առաջադրվել էին գործող քաղաքապետ՝ ԲՀԿ-ական Գագիկ Մաթևոսյանը և նախկին քաղաքապետ Արմեն Քեշիշյանը՝ Ուզբո մականունով:
Հիշեցնենք, որ պաշտոնավարման ժամանակ Արմեն Քեշիշյանը 2005թ. սեպտեմբերի 24-ին ատրճանակով սպանել էր «Էլեկտրական ցանցեր» ընկերության Արզնիի մասնաճյուղի տնօրեն Աշոտ Մխիթարյանին, ազատազրկվել էր 3 տարի 6 ամիս ժամկետով: Նախընտրական շրջանում մամուլը գրեց, որ Արտաշատի օրինակով Նոր Հաճնի ղեկավարումը ՀՀԿ-ն կփորձի վերցնել ԲՀԿ-ի ձեռքից:
Ընտրություններից հետո «Առաջին լրատվական»-ը մի քանի հարց ուղղեց վերընտրված համայնքապետին:
– Պարոն Մաթևոսյան, Դուք վերընտրվեցիք: Ձեր կարծիքով՝ ի՞նչ հանգամանքներ դեր խաղացին դրա համար. շատ լա՞վ եք աշխատում, թե՞ այլ պատճառներ կան: Եվ որո՞նք են լինելու Ձեր առաջնահերթությունները:
– Ժողովուրդն է իր ձայնը տվել, ինքն է որոշել: Մնացածը նորմալ ընթացակարգով աշխատելու ենք: Ոչ մի բան էլ չի փոխվել: Ի՞նչ է եղել որ:
– Այսինքն՝ Նոր Հաճնում ոչ մի բան էլ չի փոխվելու, ինչպես եղել, այնպես էլ մնալո՞ւ է:
– Նոր էներգիայով ենք աշխատելու, տեմպով գնալու ենք առաջ:
– Պարոն Մաթևոսյան, առաջիկայում հնարավոր կլինի՞ Նոր Հաճնի ադամանդի գործարանները ամբողջական ծավալով գործարկել, կա՞ դրա հնարավորությունը:
– Գործարանները մասնավոր են, և բոլորի սեփականատերերն էլ շահագրգռված են՝ ինչքան շուտ հասնեն դրան, այնքան լավ: Համենայնդեպս, աշխատում են գործարանները, աշխատատեղեր ունենք: Նորմալ է:
– Պարոն Մաթևոսյան, փաստորեն ԲՀԿ-ին հաջողվեց Նոր Հաճնը պահել իր ազդեցության տակ: Մամուլը գրում էր, որ ՀՀԿ-ն ցանկանում է քաղաքը վերցնել: Ինչպե՞ս հաջողվեց այս պայքարում հաղթող դուրս գալ:
– Ես, ճիշտն ասած, էդպիսի հրապարակումներին չեմ արձագանքում, քանի որ անլուրջ եմ համարում: Ինչ ա նշանակում՝ ՀՀԿ, ԲՀԿ: Համայնքը կա, ժողովուրդը որոշում է, և վերջ: Իսկ ինչ վերաբերում է կուսակցություններին, ապա էն կուսակցությունը, որը ժողովրդի մասին մտածում էր ընտրությունների ժամանակ, համապատասխան աշխատանքներ տարավ, մարդկային մոտեցում ցուցաբերեց: Ինչ կա, դա է:
– Ձեր ասածից կարելի է եզրակացնել, որ ՀՀԿ-ն ժողովրդի մասին չի մտածում, եթե ձեզ չեն աջակցել :
– Ոչ: Եկեք ես այդ հարցերին չպատասխանեմ: Մամուլը ինչ ուզում՝ գրում է: Ստեղ տենց բաներ չկան: ՀՀԿ-ն խլում է, չի խլում, ես տենց բաներ չգիտեմ և չեմ ուզում խառնվել դրան: Ժողովուրդը մեզ ընտրել է, և պարտավոր ենք լուռ աշխատել: Այսքանը:
Լուսանկարը՝ ynker.am-ի
