Յուղազրկված յոգուրտն ավելի շատ է մեծացնում մարմնի քաշը, քան սովորական կաթից պատրաստվածը, տեղեկացնում են ԱՄՆ Սթենֆորդի համալսարանի գիտնականները: Ուսումնասիրողները պնդում են, որ շաքարն ու հավելումները, որոնք ավելացվում են ճարպերի փոխարեն, ճարպակալման պատճառ են դառնում:
Գիտնականների կարծիքով՝ այս տենդենցը տարածվում է սննդամթերքների բոլոր ճարպազրկված տեսակների վրա: Օրինակ, յուղազրկված ելակի յոգուրտը կարող է ընդամենը 2 % ճարպ պարունակել, սակայն դրա մեջ 17 գ շաքար կա, որն էլ կազմում է կնոջը խորհուրդ տրվող օրական չափաքանակի 1/3 մասը:
Այս առումով առավել վտանգավոր է եգիպտացորենի օշարակը, որը համային հատկանիշները բարելավելու համար լայնորեն օգտագործվում է ճարպազրկված սննդամթերքների արտադրության մեջ: Փորձագետները զգուշացնում են, որ այդ սննդամթերքները հարկավոր չէ գնել, և խորհուրդ են տալիս ավելի ուշադիր կարդալ պիտակները:
