Грузия Online-ի փոխանցմամբ, երեկ Վրաստանի խորհրդարանը միաձայն ընդունել է «Ազատության խարտիա»-ն, որը նախատեսում է երկրում կոմունիստական խորհրդանիշների սահմանափակում ու արգելում։ Խարտիայի հեղինակը ընդդիմադիր «Ուժեղ Վրաստան» խմբակցության նախագահ Գիյա Տորտլաձեն է, ըստ որի՝ խարտիայի ընդունումը կնվազեցնի երկրի դեմ ուղղած արտաքին սպառնալիքները։
Խարտիայի համաձայն՝ նախկին Խորհրդային միության հատուկ ծառայություններում աշխատած և կոմունիստական կուսակցության նախկին բարձրաստիճան պաշտոնյա հանդիսացած անձինք և կոմերիտականները չեն կարող աշխատել կառավարական մարմիններում։
Բացի այդ, ՆԳՆ-ի ենթակայության ներքո ստեղծվելու է հանձնաժողով, որն ուսումնասիրելու է ճարտարապետական շինություններում ու աշխարհագրական տեղանուններում սովետական խորհրդանիշների առկայությունը և դրանց փոփոխման ու ապամոնտաժման մասին համապատասխան որոշումներ է կայացնելու:
