РИА Новости-ի փոխանցմամբ՝ մոսկովյան հիվանդանոցում մահացել է Թուրքիայում անորակ ալկոհոլ օգտագործած երրորդ ռուս զբոսաշրջուհին։ Խոսքը 1989 թվականին ծնված Մ.Շևելևայի մասին է, որը սպիրտային թունավորման պատճառով հիվանդանոցում մահացել է երկուշաբթի գիշերը։
Նշվում է, որ նա Թուրքիայից ժամանել է Մոսկվայի Դոմոդեդովո օդանավակայան, հասել իր հարազատների մոտ, որոնք էլ նրա առողջական վիճակի վատանալուց հետո հասցրել են մոտակա հիվանդանոց։
Շևելևան թուրքական անորակ ալկոհոլի օգտագործման պատճառով մահացած երրորդ ռուս զբոսաշրջուհին է։ Նրանից առաջ երկու ռուս զբոսաշրջուհիներ մահացել էին Անթալիայի հիվանդանոցներում։
Հիշեցնենք, որ մայիսի 25-ին թուրքական դատարանը չեղյալ էր հայտարարել այս տարվա հունվարին ալկոհոլի վաճառքի վրա դրված սահմանափակումները, ըստ որոնց՝ ալկոհոլ գնել ցանկացողների տարիքը 18-ից բարձրացվել էր 24-ի, իսկ խանութներին արգելվել էր վաճառել փոքր շշերով սպիրտային խմիչքներ:
Նույն օրենքով արգելվել էր նաև ալկոհոլի վաճառքը զանգվածային վայրերում, ուր հավաքվում է երիտասարդությունը, այսինքն՝ փառատոների, համերգների և նմանատիպ այլ միջոցառումների ժամանակ:
Այդ ամենը պատճառաբանվել էր երիտասարդությանն ալկոհոլից հեռու պահելու անհրաժեշտությամբ:
