Այսօր ոչ թե Անկախության, այլ Ինքնորոշման օր է: Այս մասին Ազատության հրապարակում հրավիրված համատեղ հանրահավաքի ընթացքում հայտարարեց ԱԻՄ առաջնորդ Պարույր Հայրիկյանը. «Նրանք ովքեր այս օրը կոչում են Անկախության օր, մի փոքր խեղել են։ Եթե կոչեին Ինքնորոշման օր, ապա այլևս լևոնորոշման, սերժորոշման, ռոբերտորոշման տեղ չէր մնա:
Մենք գիտենք, որ հայ ժողովրդի Անկախության օրը սկսվում է Հայկի ու Բելի կռվից։ Ադրբեջանում այսօր տոն է` իրենց անկախության իննսունհինգամյակն են նշում` ասելով, որ հայերը քոչվոր ցեղ են, հայերն իրենց անկախության 22-ամյակն են նշում։ Փաստորեն, իրենք հին պետականություն են, մենք՝ նորաթուխ, բայց այդպես չէ»։
Հայրիկյանը նշեց, որ մեր վերականգնման օրը եղել է 18 թվականին, իսկ 91 թվականին ընդամենը «այո» ասելու օր էր:
ԱԻՄ առաջնորդը հավելեց, որ այսօր իրենք որոշել էին առանձին հավաք անել, բայց քաղաքապետարանը համատեղել է երկու հավաք. «Չգիտեմ՝ դավադրաբար թե պատահաբար՝ որոշել էին երկու հանրահավաք թույլ տալ։ Մենք, խորհրդակցելով «Ժառանգության» հետ, որոշեցինք համատեղ հավաք անել: Շատ ազգեր են սիրում միասնություն, բայց հայերը չեն սիրում։ Այո՛, երբ մեր ազգային անվտագությանը վտանգ է սպառնում մենք պետք լինենք միասնական»:
Անդրադառնալով Մաքսային միությանն անդամագրվելու վերաբերյալ Սերժ Սարգսյանի հայտարարությանը՝ Պարույր Հայրիկյանն ասաց. «Գոյություն չունի այդպիսի միավորում։ Ծրագրում են այդպիսի բան ստեղծել, բայց չեն կարող: Շուտով այնտեղից Ռուսաստանն էլ դուրս կգա, կմնա միայն փչացած Հայաստանը: Ասեմ` մեզ չեն կարող փչացնել, կարող են փչացնել մեր ղեկավարությանը, բայց՝ ոչ մեզ:
Ես ակնկալում էի, որ մեր նախագահը Հայաստան վերադառնալուց ասի, որ Մոսկվայում այդպիսի բան է ասել, որովհետև իր առջև անվտանգության խնդիր են դրել: Թող ներողամիտ լինի «Ժառանգությունը», բայց ՀՀԿ-ն, «Ժառանգությունը», ՕԵԿ-ը միասին դեպի Եվրոպա ձգտող կուսակցություն էին, այնպես որ, եթե ասում են նախապես էինք ծրագրել` ստում են:
