Թուրքական Hürriyet թերթի փոխանցմամբ, երեկ Թուրքիայի վարչապետ Էրդողանն իր նախընտրական քարոզչության շրջանակներում սևծովյան Խոփա քաղաքում լարված հանդիպում է ունեցել տեղաբնակների հետ, որից հետո ուղևորվել է ուղղաթիռի թռիչքային հարթակ՝ Տրապիզոն մեկնելու համար։
Բայց հենց նրա ավտոբուսը հանրահավաքի վայրից հեռացել է 300 մետր, մի խումբ անձինք քարերի հեղեղ են տեղացել ավտոբուսի և նրան պահպանող ավտոշարասյան վրա։ Քարերից մեկը դիպչել է Էրդողանի թիկնապահներից մեկի գլխին, որն ուշագնաց լինելով՝ վայր է ընկել։ Ետևից եկող ավտոշարասյունը քիչ է մնացել վրաերթի ենթարկի նրան։
Ավտոշարասյունն անմիջապես կանգ է առել, թիկնապահները սկսել են օդ կրակել՝ ամբոխին մոտ չթողնելու համար։ Այժմ վիրավոր թիկնապահի առողջական վիճակը գնահատվում է ծանր։
