ՀՀ անկախության օրվա միջոցառումների շրջանակում 2013թ. սեպտեմբերի 18-ին Բելառուսի պետական ֆիլհարմոնիայի դահլիճում կայացել է համերգ՝ նվիրված հայ մեծանուն կոմպոզիտոր Արամ Խաչատրյանի ծննդյան 110-ամյակին:
Միջոցառումը կազմակերպել էին՝ Բելառուսի Հանրապետությունում ՀՀ դեսպանությունը և Բելառուսի «Միասին» երիտասարդական կազմակերպությունը՝ ՀՀ մշակույթի նախարարության, ՀՀ պետական կոնսերվատորիայի և Բելառուսի հայազգի բարերարների աջակցությամբ:
ՀՀ ԱԳՆ մամլո գրասենյակից «Առաջին լրատվական»-ին հայտնում են, որ համերգին ելույթ են ունեցել Հայաստանից ժամանած, միջազգային մրցույթների դափնեկիր, ջութակահարուհի Լուսինե Հարությունյանը և Բելառուսի պետական ֆիլհարմոնիայի մենակատար, դաշնակահար Ալեքսանդր Պոլյակովը:
Հնչել են Ա.Խաչատրյանի, Ա.Բաղդասարյանի, Կոմիտասի և այլ հեղինակների ստեղծագործություններ:
Միջոցառմանը ներկա են եղել ԲՀ-ում հավատարմագրված դիվանագիտական առաքելություների, ինչպես նաև հայ համայնքի ներկայացուցիչներ:
