Ասոցացման համաձայնագրին միանալու ցանկությունն ի սկզբանե է եղել, և այսօր էլ այդ հարցը մնում է իշխանությունների քաղաքական օրակարգում:
Այսօր տեղի ունեցած քննարկման ժամանակ այս մասին հայտարարեց ՀՀԿ-ական պատգամավոր, ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը:
«Պետք է գտնել ճանապարհներ, որոնք Հայաստանին կպահեն Ասոցացման համաձայնագրի ծիրում: Իսկ խոսակցությունները, որ Մաքսային միությանն անդամակցելու որոշումից հետո մենք անվստահելի գործընկերոջ համբավ ենք ձեռք բերել, իրականությանը չեն համապատասխանում: ԵՄ-ի հետ գործընկերության Հայաստանի ճանապարհը դեռ նոր է սկսվել, և դրա ավարտի մասին խոսելն իրականության հետ ընդհնարապես կապ չունի: Այդ կառույցի հետ իրականացվող՝ 90-ից ավել ծրագրերի մեծ մասն այսուհետ էլ շարունակվելու են: Մենք շարունակելու ենք ասոցացման ծիրում մնալ, շարունակելու ենք ժողովրդավարության, իրավական համակարգի բարեփոխումների ուղին:
ԵՄ-ի հետ Հայաստանի հարաբերությունները սկսվել են շատ վաղ՝ աստիճանաբար ձեռք բերելով ավելի խոր բնույթ: 2009 թվականից այդ համագործակցությունն ավելի ուրվագծված տեսք է ստացել Արևելյան գործընկերության շրջանակներում, ուր սկսվել են Ասոցացման համաձայնագրի շուրջ բանակցությունները: Հայաստանն այդ ժամանակվանից բարձրաձայնել է իր արտաքին բազմավեկտոր քաղաքականության մասին: Մաքսային միությանը Հայաստանի անդամակցությունը տեխնիկական և իրավական հակասություններ չի ծնելու ԵՄ-ի հետ համագործակցության ճանապարհին: Իսկ Հայաստանի ինքնիշխանությունը սահմանափակող որևէ հանձնառություն ուղղակի գոյություն չունի»,- ասաց նա:
Արտակ Զաքարյանի խոսքով՝ իշխանությունները միշտ էլ հայտարարել են, որ չի կարելի գնալ «կամ, կամ»-ի ճանապարհով: «Մաքսային միությանը Հայաստանի անդամակցության վերաբերյալ քննարկումները դեռ վաղուց են սկսվել՝ 2006 թվականից: Մենք ապրում ենք մի տարածաշրջանում, ուր ազգային անվտանգությունն անընդհատ գտնվում է սպառնալիքների ներքո: Բնականաբար, այս համագործակցությունը մեզ համար միշտ շատ կարևոր է եղել և ապագայում ևս կարևոր է լինելու: Անտրամաբանական կլիներ, եթե Հայաստանը հրաժարվեր ՄՄ-ի հետ համագործակցությունից: Մնացածն արդեն իրավական գործընթաց է, որը մեծ ծավալի աշխատանք է պահանջում»,- նկատեց պատգամավորը՝ հավելելով, որ հնարավորինս արագ պետք է գտնվեն այն լուծումները, որոնք Հայաստանին թույլ կտան մասնակցել ինչպես Արևելյան գործընկերության, այնպես էլ ՄՄ-ի գործընթացներին: «Սեպտեմբերի 3-ին հայաստանյան քաղաքական կյանքում արտառոց ոչինչ տեղի չի ունեցել: Ամեն բան շատ ռացիոնալ և սպասելի էր»,- ասաց Արտակ Զաքարյանը:
