«Ժառանգություն» կուսակցության առաջնորդ Րաֆֆի Հովհաննիսյանն օրերս «Ազատություն» ռադիոկայանին տված հարցազրույցում հայտարարել է, որ Հայաստանում փոքր կուսակցությունները չեն կարող առանձին-առանձին պայքարել իշխանությունների դեմ, և դրա համար անհրաժեշտ է կուսակցությունների խոշորացում։
Հովհաննիսյանը հայտարարում է նաև, որ անհրաժեշտ է ընդդիմադիր խոշոր բևեռի ձևավորում, և դրա համար առաջարկում է համագործակցել թե ՛ խորհրդարանական, թե՛ արտախորհրդարանական ընդդիմության հետ։
Հովհաննիսյանի առաջարկը դեռ քաղաքական դաշտում լայն քննարկումների առարկա չի դարձել։ Շատ ուժեր խորհրդարանական ընտրություններից հետո ընդհատակ են անցել, և դեռ հայտնի չէ՝ առհասարակ շարունակելո՞ւ են իրենց գործունեությունը, թե՞ ոչ։
Օրերս մեզ հետ զրույցում այս առաջարկին արձագանքել էր ԱԻՄ առաջնորդ Պարույր Հայրիկյանը՝ հայտարարելով, որ ով շեղվում է սահմանադրական փոփոխություններ անելու օրակարգից՝ սրիկա է, և որ Հովհաննիսյանն էլ ընդամենը «թեթևսոլիկ է»։ «Ժողովրդական» կուսակցության նախագահ Տիգրան Կարապետյանն էլ հայտարարում է, որ ինքն առհասարակ դադարեցնում է իր քաղաքական գործունեությունը՝ հիասթափված է խորհրդարանական ընտրություններից։
Րաֆֆի Հովհաննիսյանի առաջարկը դրական է համարում «Քրիստոնեա-ժողովրդական վերածնունդ» կուսակցության ղեկավար Սոս Գիմիշյանը։
«Առաջին լրատվական»-ի հետ զրույցում Գիմիշյանն ասաց ՝ցանկացած համախմբմանը կողմնակից են, մնում է՝ հասկանան նպատակը. «Մենք խորհրդարանական ընտրություններից առաջ էլ հանդիպումներ էինք ունենում տարբեր ուժերի հետ ու ասում ՝ եկե՛ք համախմբվենք, մի կողմ թողնենք մեր անձնական ամբիցիաները։ Գիտեք՝ «Հայք» ծրագիրն ենք արդեն մի քանի տարի իրականացնում, որի նպատակը ողջ հայության միավորումն է, էլ ուր մնաց՝ նեղ շրջանակում, միայն Հայաստանի ներսում չուզենանք դա անել. իհարկե, կողմ ենք։ Հիմա պետք է հասկանանք՝ միավորվում ենք, որ ի՞նչ, հանուն ո՞ր նպատակների, ո՞ր արժեքների, աթոռի՞, իշխանությա՞ն, թե՞ երկիր կառուցելու։ Եթե հասկանանք, ապա խոսք չկա, կասկած չկա, որ մեր կուսակցությունը կողմ կլինի։ Ամենակարևորը նպատակը հասկանալն է»,- ասաց մեր զրուցակիցը։
Նրա խոսքով՝ այժմ Հայաստանի խնդիրներն այնքան են մեծացել, մարտահրավերներն այնքան շատ են, որ միայնակ ո՛չ Հայաստանը կարող է իր խնդիրը լուծել, ո՛չ Արցախը, ո՛չ Արևմտյան Հայաստանը, ոչ էլ Սփյուռքը. «Մենք արդեն երկար տարիներ է՝ զբաղվում ենք համայն հայության ամբողջականության հարցով։ Եթե մենք այդպիսի խնդիր դնենք՝ հնարավոր է հասնենք ցանկալի արդյունքի։ Երբ համայն հայության խնդիր ես դնում, նեղ անձնական խնդիրները պետք է մի կողմ դնես ու բոլորի հետ պատրաստ լինես համագործակցել։ Մեր մոտեցումը սա է ՝ գլխավորը ճիշտ նպատակներ ու արժեքներ դնելն է։ Եթե ստացվի՝ ուրախ ու երջանիկ կլինենք, նախաձեռնողին էլ շնորհակալ կլինենք, և հեչ կարևոր չէ, թե ով է նախաձեռնողը»,- եզրափակեց Սոս Գիմիշյանը։
«Ազգային համաձայնություն» կուսակցության ղեկավար Արամ Հարությունյանը «Առաջին լրատվական»-ի հետ զրույցում ասաց, որ կուսակցությունների արհեստական խոշորացմանը կողմնակից չէ. «Հայաստանն այսօր մեկ խնդիր ունի՝ Սերժ Սարգսյանը, նա անվտանգության սպառնալիք է։ Հիմա մեկ, թե տասը կուսակցությունով՝ կարևոր չէ, կարևորը նրան հեռացնելն է։ Բոլորը պետք է կողք կողքի կանգնեն, որ ժողովուրդն էլ տեսնի՝ միասնական են, կարևոր չէ՝ կուսակցությո՞ւն է, հասարակական կազմակերպությո՞ւն, թե՞ մտավորական, պետք է իրար կողքի կանգնել, և ոչ թե մեկը գնա հարթակ ու ասի՝ եկեք բոլորդ այստեղ։ Պետք է նախօրոք կոնսուլտացիաներ լինեն, ու որոշվի, թե ինչպես հեռացնել Սերժ Սարգսյանին, հստակ ծրագիր է պետք, ոչ թե գովազդի նման հայտարարենք՝ «Եկեք մի հատ էլ փորձենք ու վերջ»»։
Հարությունյանը հավելում է՝ եթե Հայաստանում նորմալ ընտրություններ լինեն՝ կուսակցությունները կխոշորանան, ու քանակը կպակասի. «Մնացածը արհեստական բաներ են։ Մենք միավորվում ենք գաղափարի շուրջը, և այդ գաղափարի ռեժիմի առանցքը Սերժ Սարգսյանի հեռացումն է։ Եթե խնդիրը կոնկրետ ձևակերպված չէ՝ մնացած լուծումների մասին անիմաստ է խոսել»,- եզրափակեց նա։
