Google ընկերությունն ստեղծել է վիրտուալ հանրագիտարան, որը նվիրված է նորաձևության պատմությանը: Նախագիծն ստացել է We Wear Culture անվանումը։
Դրա ստեղծման համար թվայնացվել են այն թանգարանների հավաքածուները, որոնք մասնագիտացած են նորաձևության և կոստյումների պատմության մեջ: Նյութերը ներկայացված են թեմատիկ հավաքածուներում և լրացված են փորձագետների մեկնաբանություններով:
«Google-ը չի ասոցացվում նորաձևության հետ: Մենք չենք ցանկանում ուշադրությունը կենտրոնացնել նորաձևության բուն օբյեկտների վրա, մեզ հետաքրքիր է անցյալի, ներկայի և ապագայի վարպետությունն ու ձեռքի աշխատանքը»,-ասել է Google Art & Culture-ի տնօրեն Ամիթ Սուդը:
Ի թիվս այլ բաների՝ հանրագիտարանում կարելի է տեսնել, թե ինչպես են ստեղծվում կիմոնոները, ուսումնասիրել Ռուսաստանի կայսրության կոստյումների պատմությունը, իմանալ, թե ինչպես են հայտնվել հուդիները և բրիտանացի մոդելագործ Վիվիեն Վեսթվուդի փանք-հավաքածուները, ինչպես նաև վերլուծական մեծ նյութեր ընթերցել Իտալիայում մասս-մարկետի կամ նորաձևության ինդուստրիայի վերաբերյալ:
