Արտաքին քաղաքականության հարցերով ամերիկյան խորհրդի փոխնախագահ Իլան Բերմանը կարծում է, որ Ռուսաստանը գտնվում է մեծ ցնցումների շեմին, ինչը լիակատար պարտության կհանգեցնի համաշխարհային թատերաբեմում, գրում է USA Today-ը:
Բերմանի կարծիքով՝ չնայած Ռուսաստանը ծաղկող տեսք ունի, դրանում թաքնված է «աճող թուլություն»:
«Ռուսաստանն արագ մոտենում է մոնումենտալ փոփոխություններին, որոնք խոստանում են լինել նույնքան նշանակալից, ինչպես ԽՍՀՄ-ի փլուզումը 20 տարի առաջ: Արդյունքը կարող է դառնալ ազգի վերջը»,- ասվում է հոդվածում:
Հեղինակի կարծիքով՝ պատճառներից մեկը սլավոնական բնակչության կրճատումն է, որի պատճառը կյանքի տևողության նվազումն է, թմրամոլությունը, ալկոհոլիզմը և ցածր ծնելիությունը: Մինչև դարակես Ռուսաստանի բնակչությունը կարող է կրճատվել 25%-ով: Ընդ որում՝ մինչև 2020թ. մուսուլման բնակչությունը կարող է կազմել երկրի բնակչության 20%-ը:
Բերմանը կարծում է,որ Ռուսաստանում կարող է քաղաքացիական պատերազմ բռնկվել, իսկ երկրի արևելքում, որտեղ չինական գերիշխանությունն անխուսափելի է դառնում, Մոսկվայի և Պեկինի միջև հարաբերությունները կարող են վերաճել բաց հակամարտության:
