Արցախի Հանրապետության պաշպանության բանակի հրամանատար, գեներալ-լեյտենանտ Լևոն Մնացականյանն իր մաղթանքներն է ուղղել առաջիկա զորահավաքին զորակոչվող նորակոչիկներին: «Ռազմական դասընթացների շրջանակներում» լրագրողների հետ հանդիպման ժամանակ Արցախի պաշտպանության բանակի հրամանատարը նշեց, որ զորակոչվողներին մաղթում է, որ եռանդով ներկայանան հավաքակետեր և իրենց ջանքերը ներդնեն հայրենիքի պաշտպանության վեհ գործում:
«Մենք ունենք նրանց կարիքը և ամեն ինչ անելու ենք, որ նրանց հետագա ծառայությունն անցնի անվտանգ, հարմարվելու փուլն անցնի ավելի սահուն. որոշակի պատրաստություն անցնելուց հետո ընդգրկվեն մարտական հերթապահության և մասնակցեն մեր անվտանգության ապահովման գործընթացին: Ցանկանում են նրանց զորակոչվելուց հետո անվտանգ ծառայություն և խաղաղություն, իսկ անհրաժեշտության դեպքում միայն ու միայն հաղթանակներ»,- ասաց ՊԲ հրամանատարը:
Արցախա-ադրբեջանական սահմանին իրավիճակը, կարելի է ասել, կայուն լարված է։ ՊԲ հրամանատարը հավելեց, որ դեռևս ավելի մեծ լարվածության միտում չի դիտվում, իսկ համեմատելով նախորդ ամիսների հետ՝ լարվածության որոշակի նվազման միտում կա։
«Մեր կողմից տրված պատասխանները նպատակային են, տրվել են այնպիսի պատասխաններ, որ փորձ չձեռնարկեն նման հարվածներ հասցնելու: Աշխատել ենք այնպես անել, որ նրանց տված վնասը ավելի շատ լինի, քան իրենց կողմից մեզ հասցվածը»,- ասաց Մնացականյանը։
«Ադրբեջանն ամեն ինչ անելու է, որպեսզի առաջնագծում միշտ լարվածությունը պահպանվի, գնալով աշխատելու է, որպեսզի մեզ վնասներ հասցնի, մենք էլ ամեն ինչ անելու ենք, որպեսզի համարժեք պատասխան տանք և անհրաժեշտության դեպքում, երբ նպատակահարմար գտնենք, վերջնական հարված հասցնենք»,-նշեց ՊԲ հրամանատարը:
Նա փաստել է նախորդ տարվա ապրիլից հետո սահմանագծում իրականացված մեծածավալ աշխատանքների մասին. ոչ միայն տեսադիտարկող սարքեր են տեղադրվել, այլ նաև ինժեներական կահավորում է արվել, բարելավվել են անվտանգության ապահովման և կենցաղային պայմանները:
«Իհարկե, մենք առաջին հերթին տեսադիտարկման համակարգով բացառել ենք կամ նվազագույնի ենք հասցրել մարդու գործոնը սահմանափակ տեսանելիության գոտիներում դիտարկելիս: Այդ առումով ամբողջությամբ վերահսկելի է առաջնային գիծը»,- ասաց նա:
