Ադրբեջանի ընդդիմադիր ուժերից կազմված Ազգային խորհուրդը Մեհրիբան Ալիևայի առաջին փոխնախագահի պաշտոնում նշանակվելուց հետո երկրում սկսված զանգվածային ճնշումների վերաբերյալ զեկույց է հրապարակել: Այս մասին հայտնում է ադրբեջանական azadliq.info լրատվական գործակալությունը:
«Ադրբեջանում մարդու իրավունքների ծանր վիճակը վերջին մի քանի ամիսների ընթացքում հասել է ավելի վտանգավոր և անհանդուրժելի աստիճանի»,- նշված է ընդդիմադիր ուժի հրապարակած զեկույցում:
Ազգային խորհրդի փոխանցմամբ` Մեհրիբան Ալիևային առաջին փոխնախագահի պաշտոնում նշանակելով, և դրանից հետո երկրում ճնշումներն առավել ակտիվացնելով, ալիևյան ընտանիքն իր միապետական իշխանությունն ամրապնդելու համար ընտրել է ժողովրդի շրջանում վախի մթնոլորտն ավելի մեծացնելու ճանապարհը:
«Պետական մարմինների մասնակցությամբ տեղի են ունենում ծանր հանցագործություններ: Երկրում իշխանությունների քննադատներին, ընդդիմության ներկայացուցիչներին վարչական լծակների կիրառմամբ տեռորի ենթարկելու ծավալները հասել են աննախադեպ ծավալների»,- նշված է զեկույցում:
Մայիսի 30-ին ձերբակալվել է Ադրբեջանցի հայտնի ընդդիմադիր ակտիվիստ, հետազոտող լրագրող Աֆղան Մուխթարլըն, ով որպես քաղաքական վտարանդի երկար ժամանակ ապաստան էր գտել Վրաստանում:
Նա Թբիլիսիում առևանգվելով տարվել է Բաքու, որտեղ ձերբակալվել է պետական սահմանն անօրինական հատելու և մաքսանենգության հատկանիշներով:
«Ադրբեջանի կառավարության կողմից Մուխթարլըին բռնի Բաքու տեղափոխելու հանգամանքը խոսում է այս երկրի կառավարության ժողովրդավարության բոլոր օրենքներին հակասող գործելաոճի մասին»,- ասվում է զեկույցում:
Մայիսի 26-ին Ադրբեջանա-վրացական սահմանին ձերբակալվել է ընդդիմադիր Ադրբեջանի Ժողովրդական ճակատ կուսակցության փոխնախագահ, Ազգային խորհրդի համակարգող մարմնի անդամ Գյոզալ Բայրամլըն:
Բայրամլըն մեղադրվում է մաքսանենգության և չհայտարարագրված գումարներ տեղափոխելու մեջ:
«Ադրբեջանցի կին ամենահայտնի քաղաքական գործիչ Բայրամլըի պայուսակ 12 հազար դորալ գցելով իշխանությունները նրա դեմ կեղծ մեղադրանքներ են հարուցել»,- նշված է զեկույցում:
Դատարանը Բայրամլըին դատապարտել է 3 ամսվա նախնական ազատազրկման:
Ադրբեջանի ընդդիմադիր ուժերից կազմված Ազգային խորհրդի ներկայացուցիչների կարծիքով` այս երկու ձերբակալությունները վկայում են այն մասին, որ արդեն իշխանությունների կողմից ընդդիմադիրներին տեռորի ենթարկելու գործողությունների մեջ ներգրավված են նաև երկրի սահմանապահ ծառայության ներկայացուցիչները:
«Անզեն աչքով երևում է, որ և Բայրամլըի և Մուխթարլըի դեմ կատարվող քայլերն, իրականացվում են ալիևյան ընտանեկան իշխանությանը ամենամոտ կանգնած մարդկանց քաղաքական պատվերներով»,- նշում են հոդվածի հեղինակները:
«Ադրբեջանի ընդդիմադիր Ազգային խորհրդը դատապարտում է այս երկու ընդդիմադիրների ձերբակալությունները, և պահանջում ազատ արձակել նրանց»,- նշված է զեկույցի եզրափակիչն հատվածում:
Ալիևյան ընտանիքը հերևողականորեն շարունակում է լռեցնել, իրեն քննադատող, իր դեմ հանդես եկող ցանկացած գործչի: Այս ամենը հասարակության շրջանում ավելի է խորացնում հուսալքությունը և վախի մթնոլորտը: Այս ամենը ընդդիմադիր գործիչների կարծիքով կարող է հանգեցնել լուրջ ժողովրդական ընդվզման:
Հունիսի 1-ին Միջազգային իրավապաշտպան Human Rights Watch կազմակերպությունը կոչ էր արել Ադրբեջանի իշխանություններին անմիջապես ազատ արձակել Թբիլիսիից առևանգված ադրբեջանցի լրագրող Աֆղան Մուխտարլիին և հորդորել Վրաստանի իշխանություններին հետաքննել կատարված միջադեպը:
Աֆղան Մուխտարլին հայտնի է որպես ադրբեջանական իշխանությունների վարած քաղաքականության քննադատ: 2015 թվականից ի վեր ստիպված է եղել բնակություն հաստատել Թբիլիսիում: Օրերս նա անհետացել էր, ինչի կապակցությամբ ընտանիքը դիմել էր ոստիկանություն: Ավելի ուշ նա հայտնվել էր Բաքվում և ձերբակալվել: Նա հայտարարել է, որ Թբիլիսիի կենտրոնից իրեն առևանգել են քաղաքացիական հագուստով անհայտ անձինք, ովքեր խոսում էին վրացերենով: Նրան նստեցրել են մեքենա և դուրս բերել Վրաստանից, ապա դաժան ծեծի են ենթարկել, կապել աչքերը և տեղափոխել մեկ այլ մեքենա, իսկ արդեն ադրբեջանական սահմանին կրկին տեղափոխել են երրորդ մեքենա, որում արդեն խոսել են ադրբեջաներենով: Մեքենայում նրա գրպանում խոշոր չափի գումար են դրել, և այժմ Ադրբեջանի իշխանությունները նրան մեղադրում են գումարի ապօրինի տեղափոխման և սահմանը հատելու մեջ:
Լրագրողի փաստաբանն արդեն հանդիպել է նրան և փաստել, որ քթի և ճակատի հատվածում երևում են ծեծի հետքերը, աչքերի տակ կապտուկներ են: Աֆղանն ասել է, որ կրծքավանդակում ուժեղ ցավեր ունի, կարծում է, որ կողի կոտրվածք է ստացել:
Սաբաիլի շրջանային դատարանը Թբիլիսիից առևանգված ադրբեջանցի լրագրող Աֆղան Մուխտարլիի նկատմամբ որպես խափանման միջոց է սահմանել երեք ամսով կալանքը:
Մուխտարլիի առևանգման գործով մտահոգություն են հայտնել Վրաստանի պատկան մարմինները, այդ թվում և երկրի նախագահ Գեորգի Մարգվելաշվիլին:
Հուլիսի 1-ին մեկ այլ հեղինակավոր միջազգային իրավապաշտպան «Լրագրողներ առանց սահմանների» կազմակերպությունը կոչ էր արել Վրաստանի իշխանություններին՝ բացատրել, թե ինչպես է 2015 թվականից Վրաստանում բնակվող ադրբեջանցի լրագրող Աֆղան Մուխտարլին առևանգվել ու փոխանցվել Ադրբեջանին:
