Տարածաշրջանային հետազոտությունների կենտրոնի տնօրեն, քաղաքագետ Ռիչարդ Կիրակոսյանը համոզված է, որ նախագահ Սարգսյանի և վարչապետ Կարապետյանի միջև կա լուրջ կոնֆլիկտ ներիշխանական պայքարի համատեքստում:
Քաղաքագետը «Առաջին լրատվական»-ի հետ զրույցում նշեց, որ խորհրդարանական ընտրություններից հետո տեսնում էինք աթոռակռիվ Հայաստանի իշխանության ամենատարբեր մակարդակներում, լինի դա պայքար պատգամավորական մանդատի, նախարարի թե մեկ այլ պաշտոնի համար, բայց իրական կոնֆլիկտը դեռևս առջևում է: Ռիչարդ Կիրակոսյանը նկատի ունի պայքարը իշխանության համար 2018-ին՝ նախագահ Սերժ Սարգսյանի լիազորությունների ժամկետի ավարտից հետո:
«Դեռևս նկատելի չէ իրական կոնֆլիկտը, որը առջևում է: Այդ իրական կոնֆլիկտը հետևյալ հարցերի շուրջ է, թե ի՞նչ կանի նախագահ Սարգսյանը, երբ հաջորդ տարվա ապրիլին սպառվի իր նախագահության երկրորդ ժամկետը, և արդյոք գործող վարչապետը կմնա՞ Հայաստանում: Այլ խոսքերով՝ ես համոզված էի, որ ԱԺ ընտրություններից հետո վարչապետը կվերադառնա Մոսկվա, բայց Մոսկվան, կարծես թե, մտադիր է վերանայել իր ծրագիրը՝ կապված վարչապետ Կարեն Կարապետյանի հետ»:
Ճշտող հարցին՝ ուզում եք ասել, որ նախագահ Սարգսյանի և վարչապետ Կարեն Կարապետյանի միջև կա իրական, թեկուզև քողարկված կոնֆլի՞կտ, քաղաքագետ Ռիչարդ Կիրակոսյանը պատասխանեց. «Ես չեմ ասում, թե միգուցե կոնֆլիկտ կա նախագահի և վարչապետի միջև, ես վստահաբար ասում եմ, որ անկասկած կոնֆլիկտ կա նախագահի և վարչապետի միջև, որի նշանակումը պարտադրվել է նախագահ Սարգսյանին Մոսկվայի կողմից»:
«Դժվար է պնդել,- ասում է փորձագետը,- որ այսօր ավելի հստակ է, թե իրադարձությունների զարգացման ո՞ր սցենարն է ավելի հավանական կամ ո՞վ կդառնա պետության առաջին դեմքը, երբ հանրապետությունն անցնի կառավարման խորհրդանական համակարգին, բայց ես առաջվա պես կարծում եմ, որ նախագահ Սարգսյանը գնալով ավելի շատ է գայթակղվելու վարչապետի պաշտոնում մնալու գաղափարով, թեև կան նաև այլ սցենարներ: Բայց սա նաև ցույց է տալիս, որ, ցավոք սրտի, մենք շարունակում ենք կենտրոնացած մնալ ոչ թե ժողովրդավարական կառավարության ինստիտուտների, այլ անձերի վրա»:
Կարդացեք նաև «Առաջին լրատվական»-ի հարցազրույցը Ռիչարդ Կիրակոսյանի հետ՝ վարչապետ Կարեն Կարապետյանի նշանակման մասին: