Եգիպտոսի նախագահ Հոսնի Մուբարաքի երկու որդիները՝ Գամալն ու Ալան քննիչներին են հայտնել իրենց հոր գաղտնի հաշվեհամարների տեղը: Այս մասին այսօր գրում է եգիպտական Al-Ahram թերթը:
Մուբարաքի որդիները հարցաքննվել են Կահիրեի Տորա բանտում, որտեղ նրանք գտնվում են արդեն մի քանի շաբաթ շարունակ: Թերթը տեղեկացնում է, որ Գամալն ու Ալան ստորագրել են արաբերենով, անգլերենով և ֆրանսերենով մի շարք փաստաթղթեր, որտեղ տեղեկություններ կան նախկին նախագահի հաշվեհամարների մասին Եգիպտոսում և նրա սահմաններից դուրս:
Հիշեցնենք, որ երեկ Մուբարաքի փաստաբանը հայտնել էր, թե նախկին նախագահն իր 62 տարվա աշխատանքային գործունեության ընթացքում վաստակել է ընդամենը մեկ միլիոն դոլար: Ամերիկյան աղբյուրները հաղորդում են 2-3 միլիարդ դոլարի մասին: Շվեյցարիան իր հերթին հաղորդել է 12 բարձրաստիճան պաշտոնայների հաշվեհամարների սառեցման վերաբերյալ, այդ թվում՝ Մուբարաքի, որոնց վրա կա 320 միլիոն դոլար գումար:
