Պետական դումայի պատգամավոր Աշոտ Եղիազարյանը բնակվում է Կալիֆոռնիայի Բևեռլի Հիլզում: Այս մասին գրում է The Wall Street Journal-ը:
Թերթը տեղեկացնում է, որ Վաշինգտոնում Ռուսաստանի դեսպանատունը ԱՄՆ-ի իշխանություններին փոխանցել Եղիազարյանին արտահանձնելու բոլոր փաստաթղթերը: Սակայն քանի որ ԱՄՆ-ի և Ռուսաստանի միջև չկա արտահանձնման պայմանագիր, հիմա ամերիկյան պաշտոնյաները ուսումնասիրում են Եղիազարյանի այն հայտարարությունները, թե ինչ իր հետ կկատարվի, եթե իրեն վերադարձնեն Ռուսաստան: Այս պահին պարզություն չկա նաև Եղիազարյանի միգրացիոն կարգավիճակի հարցում. նա ԱՄՆ-ում է գտնվում անցած տարվա սեպտեմբերից: Ավելի վաղ Եղիազարյանը պատրաստվում էր քաղաքական ապաստան խնդրել ԱՄՆ-ից:
Հոդվածագիրը հեգնում է, որ այս հակամարտությունը կարծես ստեղծված լինի Հոլիվուդի համար: Եղիազարյանի նկատմամբ վարկաբեկման գործընթացն ընթանում է հենց ԱՄՆ-ում: Վերջերս հրապարակվել են նրա նկարներն անծանոթ կանանց հետ: Փաստաբանները նշել են, որ դա արվում էր, որպեսզի Եղիազարյանը հետ կանչեր Կիպրոսի դատարան ներկայացրած հայցը, որով Պետդումայի պատգամավորը պահանջում էր վերադարձնել իրենից «անօրինականորեն խլված ունեցվածքը»:
Բացի այդ, Սքոթլանդ Յարդը հետաքննություն է սկսել այն հայցով, համաձայն որի, Լոնդոնում Եղիազարյանի փաստաբաններից մեկի նկատմամբ լրտեսական գործողություններ են իրականացրել և փորձել են համապատասխան լրտեսական ծրագիր տեղադրել նրա համակարգչում:
Հենց ԱՄՆ-ում էլ ոմն իրավապաշտպան Պյոտր Զալմաևը մեղադրել էր Եղիազարյանին ծայրահեղ ազգայնական կազմակերպությունների հետ կապ ունենալու և հակաամերիկյան և հակասեմական տրամադրություններ տարածելու մեջ: Իրավապաշտպանը նաև կոչ էր արել ԱՄՆ իշխանություններին Եղիազարյանին ԱՄՆ-ում ապաստան չտրամադրել: Եղիազարյանը Զալմաևի դեմ հայց է ներկայացրել: