Փաստաբանների պալատի ապագա նախագահը պետք է փաստաբանական համայնքի ձեռքբերումները փայփայի և զբաղվի պալատի խնդիրների լուծմամբ: ՓՊ նախագահի ընտրության օրը` սեպտեմբերի 14-ին, լրագրողների հետ ճեպազրույցում նման կարծիք հայտնեց ՓՊ նախագահի թեկնածու Արա Զոհրաբյանը:
«Ես ակնկալում եմ, որ մեր փաստաբանները պիտի ցույց տան` մեզ մոտ ընտրություններն անցնում են նորմալ, նաև հուսամ, որ մեզ մոտ փաստաբանության հեղինակությունը պիտի բարձրանա. ակնկալիքներս այս պահին այսքանն են»,- ասաց նա:
Ի պատասխան հարցի` հանուն ինչի քվեարկեց, Զոհրաբյանը պատասխանեց, որ օրենքում փոփոխություններ է պետք կատարել, թեկնածուներին զրկել ընտրելու իրավունքից, որովհետև նրանք շահագրգիռ անձինք են: Ինքը` Զոհրաբյանը, քվեարկությանը մասնակցել է զուտ այն պատճառով, որ այդպես նախատեսված է, և չմասնակցելը կնշանակեր արհամարհանք այդ գործընթացի նկատմամբ:
Թեկնածուն դժվարացավ նշել` կկարողանա՞ աշխատել Պալատի նախկին նախագահից լավ: Նրա համոզմամբ` այդ գնահատականը կտա ժամանակը: «Տարեցտարի նոր մարտահրավերներ են առաջ գալիս, նոր դժվարություններ, ով էլ ընտրվի Պալատի նախագահի պաշտոնում` պետք է դրանք հաշվի առնի»,- ասաց նա:
Զոհրաբյանը նաև տեղեկացրեց, որ ՓՊ-ն ընթացիկ տարում նոր շենք կունենա Զաքյան փողոցում: Ներկայում այնտեղ վերանորոգման աշխատանքներ են ընթանում:
Մանրամասները` մեր տեսանյութում:
