«Մաքլին Փաուեր Ինթերնեյշնլ» ընկերությունը Հայաստանում վերականգնվող էներգետիկայի ոլորտում ներդրումներով հետաքրքրված ամերիկյան ընկերություններից է, որն այսօր մասնակցում է Հայաստանում ԱՄՆ դեսպանատան կազմակերպած համաժողովին: Ընկերության տնօրեն Մարգարետ Մաքլինը լրագրողների հետ զույցում անդրադառնալով հարցին, թե ինչով է Հայաստանը հետաքրքրել իրենց, նշեց. «Հայաստանում մենք մեծ ներուժ ենք տեսնում էներգետիկ ոլորտում: Հայաստանը կարող է լավ շուկա դառնալ, այդ առումով զարգացման մեծ հեռանկարներ կան»:
Մարգարետ Մաքլինի տեղեկացմամբ՝ իրենց ընկերությունը մասնագիտանում է էլեկտրաէներգիայի փոխանցման և բաշխման սարքավորումների արտադրությունների ոլորտում, իրենք օգնում են հոսանքն արտադրման վայրից փոխանցել մինչև վերջնական սպառողին: Ընկերությունը մոտ 20 հազար անուն արտադրանք ունի»:
«Այսօր մենք այստեղ ենք, որպեսզի հասկանանք, թե ինչ մեխանիզմներ, զարգացման ինչ տարբերակ է ընտրում հայաստանյան շուկան և ինչպես են մտադիր այս ոլորտում իրենց աշխատանքները կազմակերպել: Մենք նախ և առաջ կուսումնասիրենք արդյունաբերական ճյուղը և գյուղական հոսանքամատակարարման ոլորտները»,- նշեց Մ. Մաքլինը:
Նա նաև հավելեց, որ հնարավորության դեպքում իրենք կմասնակցեն նաև Հայաստանում Համաշխարհային բանկի կողմից հայտարարվելիք մրցույթներին: «Եթե համաշխարհային բանկի կողմից իրականացվող ծրագրերով մրցույթ հայտարարվի էլեկտրաէներգիայի փոխանցման, բաշխիչ համակարգերի սարքավարումների համար, բնականաբար մենք կմասնակցենք, մեր հայտով կներկայանանք: Շատ ուրախալի է լսել, որ Հայաստանում էներգետիկ ոլորտում իր գործունեությունը նաև իրականացնում է Համաշխարհային բանկը»,- նշեց Մ. Մաքլինը:
Մանրամասները՝ տեսանյութում:
