Վերջին մի քանի օրերի ընթացքում մամուլում, իշխանական աղբյուրների հղմամբ, տեղեկություններ են շրջանառվում, որ Անկախության 22-ամյակի առթիվ Սերժ Սարգսյանը պատրաստվում է համաներում հայտարարել:
Բնականաբար, եթե այս տեղեկությունը նույնիսկ համապատասխանում է իրականությանը, ապա մինչև վերջին պահը հայտնի չի լինելու, թե համաներումը կոնկրետ որ հոդվածներով դատապարտվածների վրա կտարածվի:
Նախկինում՝ 2009 թվականին համաներմամբ ազատ արձակվեցին 2008 թվականի մարտյան արյունալի դեպքերից հետո ձերբակալված քաղբանտարկյալները, իսկ թե ինչ խնդիր են հիմա պատրաստվում լուծել իշխանությունները, առայժմ հայտնի չէ:
ՀՀ արդարադատության նախարարության քրեակատարողական հիմնարկներում և մարմիններում վերահսկողություն իրականացնող հասարակական դիտորդների խմբի նախագահ Ռոբերտ Ռևազյանն այն կարծիքին է, որ Հայաստանի քրեակատարողական հիմնարկները գերծանրաբեռնված են: Նա մեզ տեղեկացրեց, որ այժմ քրեակատարողական հիմնարկներում կա 20 տոկոս ծանրաբեռնվածություն. «20 տոկոս ավել են դատպարտյալները, կա քրեակատարողական հիմնարկ, որ շատ ավելի են դատապարտյալները, կան ՔԿՀ-ներ, որ ծանրաբեռված չեն… Ընդհանուր թվով 20 տոկոս ավելի շատ մարդ կա, քան պետք է լիներ»,- ասաց նա:
«Առաջին լրատվական»-ի հարցին, թե իր գնահատմամբ՝ եթե լինի համաներում, ապա կոնկրետ ո՞ր հոդվածների վրա կտարածվի, Ռ. Ռևազյանը պատասխանեց. «Ես չեմ կարող պատասխանել` որ հոդվածների վրա կտարածվի, միանշանակ պատասխան տալ չեմ կարող»:
Այն դիտարկմանը, թե շրջանառվող լուրերի համաձայն՝ միայն թեթև հանցանք կատարած դատապարտյալները «կհամաներվեն», մեր զրուցակիցն արձագանքեց. «Ընդհանրապես այսպիսի մի խնդիր կա՝ համաներումը հիմնականում տարածվում է ոչ մեծ ծանրության կամ ծայրահեղ դեպքում միջին ծանրության հանցագործությունների վրա, բայց, այնուամենայնիվ, ես ինքս՝ որպես հումանիստ, գտնում եմ, որ համաներումը պետք է ինչ-որ չափով ներառի նաև ծանր հանցագործություն իրականացրած անձանց: Ես կողմնակից եմ նման բաների, բայց կոնկրետ չեմ կարող ասել»:
Հետաքրքրվեցինք նաև, թե հասարակական հնչեղություն ունեցող մի քանի դեպքերից՝ Ճանապարհային ոստիկանության նախկին պետ Մարգար Օհանյան, ՀՀ Աշխատանքի և սոցիալական հարցերի նախարարության Սոցիալական ապահովության պետական ծառայության նախկին պետ Վազգեն Խաչիկյան, ՀԱԿ ակտիվիստ, քաղբանտարկյալ Տիգրան Առաքելյան, ո՞ր գործն, ըստ իրեն, պետք է և կարող է արժանանալ համաներման… «Անկեղծ ասած՝ դեպքերը կամ ծանրության աստիճանները չեմ ուսումնասիրել, այդ իսկ պատճառով անկարող եմ պատասխանել»,- ասաց Ռևազյանը:
Նշենք, սակայն, որ Տիգրան Առաքելյանի գործը չի համարվում թեթև: Վերջինս դատապարտված է Քրեական օրենսգրքի 316 հոդվածի առաջին և երկրորդ մասով (Իշխանության ներկայացուցչի կամ նրա մերձավոր ազգականի նկատմամբ կյանքի կամ առողջության համար վտանգավոր բռնություն գործադրելը կամ դա գործադրելու սպառնալիքը՝ կապված նրա կողմից իր ծառայողական պարտականությունները կատարելու հետ): Այսինքն` վերջինիս համաներում շնորհելու համար անհրաժեշտ է գոնե վերացնել հոդվածի երկրորդ մասը: Այդուհանդերձ, նույնիսկ այս դեպքում գործի մեջ նշվում է, որ Տիգրանը կոտրել է ոստիկանի քիթը, ինչը փաստվում է միայն դատաբժշկական եզրակացությամբ, առանց որևէ ռենտգենի: Նույն գործում առկա է նաև այն հանգամանքը, որ Տիգրան Առաքելյանի պարանոցի վրա կան կապտուկներ, այսինքն` ապացուցում է, որ ոստիկանը իր ծառայողական պարտականություններն իրականացրել է ակտիվիստին խեղդելու միջոցով:
Կլինի՞ արդյոք համաներում, թե՞ ոչ, ի՞նչ խնդիր կլուծի սրանով իշխանությունը՝ պարզ կդառնա առաջիկա մեկ շաբաթվա ընթացքում:
