Ոստիկանության Լոռու մարզային վարչության ենթակայությամբ Վանաձորում արդեն գործում է 2 բաժանմունք` Վանաձորի բաժանմունքը ոստիկանապետ Էրիկ Շարմազանովի և Բազումի բաժանմունքը` ոստիկանապետ Սարգիս Այվազյանի ղեկավարությամբ:
Այսօր հանդիսավորությամբ բացվեց Բազումի բաժանմունքի նոր շենքը` անձամբ ոստիկանապետ Վլադիմիր Գասպարյանի մասնակցությամբ: Միջոցառմանը ներկա էին Լոռու մարզպետը, Լոռուց ընտրված ԱԺ պատգամավորները, իրավապահ համակարգի պաշտոնյաներ, ոստիկաններ:
Վլադիմիր Գասպարյանը ոստիկանության նոր շենքի անհրաժեշտությունը ներկայացրեց համակարգում կատարվող բարեփոխումների ընդհանուր համատեքստում: «Ես կարծում եմ, որ եթե մենք խոսում ենք բարեփոխումների մասին, որ մենք համազգեստի մեջ էլ ենք փոխվում, և համազգեստն էլ ենք փոխելու, ուրեմն սրա անհրաժեշտությունը կար, որովհետև սկզբից պետք է ոստիկանությունում ստեղծել պայմաններ ոստիկանի համար, որպեսզի այս պայմաններն ավելի արժանապատիվ դարձնեն նրան: Ես կարծում եմ, որ սա պետք է դիտել բարեփոխումների ընդհանուր ծրագրի մեջ: Եվ այս պրոցեսը շարունակվում է հանրապետության ոստիկանական համակարգի բոլոր ստորաբաժանումներում` անկախ նրանից` դա հաճելի՞ կլինի ոմանց, թե՞ թե տհաճ կլինի: Մենք բարեփոխվելու ենք, և այս ընթացքը անընդհատ պրոցես է, իսկ սա մտնում է այդ ընթացքի մեջ»:
Բարեփոխումների ծրագրի մի քանի առաջնային խնդիրները, ըստ ոստիկանապետի, հետևյալներն են. «Բարեփոխումները երբեք չեն կարող արդյունավետ լինել, եթե մենք ինքներս դա չգիտակցենք և չբարեփոխվենք ինքներս` ոստիկանը իր մտածելակերպի մեջ, իր մոտեցումների մեջ, իր սկզբունքների մեջ, իր ապրելաձևի մեջ, որովհետև չի լինում ինչ-որ ժամ ոստիկան, դրանից հետո, կոպտեմ մի քիչ, ինչ-որ օբյեկտներում թրև եկող ոստիկան. չի լինում էդպես: Ոստիկանը մտածելակերպ է, ապրելաձև է, դա 24 ժամ ոստիկան է. սա մեկ: Բարեփոխել նորմատիվ ակտերը, մոտեցումները, կառուցվածքը, որոնք միմյանց խանգարում են ուղղակի. այսինքն` ստեղծել նոր ոստիկանություն: Մենք դրա սկիզբը դրել ենք 2 տարի առաջ, արել ենք 10-15-20 տոկոս: Եթե մեզ հաջողվի ևս 1-2 տարվա մեջ գոնե այս ընթացքը հասցնել 50 տոկոսի, մենք կունենանք աշխարհի ամենալավ ոստիկանությունը»:
Անդրադառնալով նաև ոստիկանների աշխատավարձի բարձրացման հարցին` ոստիկանապետը կարծիք հայտնեց, որ դրա կարիքն առայժմ չկա: «Մենք հասարակության լավագույն հատվածն ենք, ես դրանում համոզված եմ: Մի քիչ էլ դիմանանք, և որակական փոփոխությունների արդյունքում աշխատավարձերը կբարձրանան: Անկեղծ ասած` ես չեմ գտնում, որ մեր աշխատավարձերը հիմա պետք է բարձրանան: Մենք ավելի շատ խնդիրներ ունենք, մենք բանակում լիքը խնդիրներ ունենք»,- ասաց Վլադիմիր Գասպարյանը:
